ছুইডেন আৰু বেলজিয়ামৰ মাজত কিং বাউডুইন ষ্টেডিয়ামত চলি আছিল ফুটবল খেলখন। সেই ষ্টেডিয়ামৰ পৰা অলপ দূৰৈত সন্ত্ৰাসবাদীৰ আক্ৰমণত বেলজিয়ামৰ ৰাজধানী ব্ৰাছেলছ ৰক্তাক্ত হৈ পৰিল। বন্দুকধাৰীৰ গুলীচালনাত নিহত হৈছে ২ জন লোকৰ।
সোমবাৰে সংঘটিত হোৱা এই ঘটনাৰ পিছতে মেচখন পৰিত্যক্ত হৈ পৰে। বেলজিয়ামৰ প্ৰধানমন্ত্ৰী আলেকজেণ্ডাৰ ডি ক্ৰুৱে কয় যে এইটো এটা সন্ত্ৰাসবাদী আক্ৰমণ। ইপিনে, এই ঘটনা আই এছ সন্ত্ৰাসবাদীয়ে সংঘটিত কৰা বুলি ইতিমধ্যে পোহৰলৈ আহিছে। আনকি তেওঁলোকে ইজৰাইলী আক্ৰমণৰ প্ৰতিশোধ লোৱা বুলিও প্ৰকাশ পাইছে।
আৰক্ষীৰ সূত্ৰ অনুসৰি, বন্দুকধাৰীয়ে হত্যা কৰা লোক দুজন ছুইডেনৰ নাগৰিক। আন এজন গুৰুতৰভাৱে আহত হৈছে। বন্দুকধাৰীয়ে ফ্লু’ৰেচেণ্ট কমলা ৰঙৰ জেকেট পিন্ধি আক্ৰমণ সংঘটিত কৰে। ছুইডেন নাগৰিক দুজনৰ হত্যাৰ পিছত তেওঁ স্কুটাৰত উঠি গুচি যায়। ঘটনাৰ পিছতে সমগ্ৰ অঞ্চলটো ঘেৰাও কৰে আৰক্ষীয়ে। অভিযুক্ত সন্ত্ৰাসবাদীৰ সন্ধান আৰম্ভ হৈছে।
লগতে পঢ়কঃ ইজৰাইল-হামাছৰ যুদ্ধত নিহত কমেও দুগৰাকী ভাৰতীয় মূলৰ মহিলা; কোন তেওঁলোক?
স্থানীয় সূত্ৰই জনোৱা মতে সোমবাৰে সন্ধিয়া ৭ বজাত ছুইডেন আৰু বেলজিয়ামৰ মাজত খেলখন বাধাগ্ৰস্ত হয়। সেই সময়তে ব্ৰাছেলছৰ উত্তৰত থকা কিং বাউডুইন ষ্টেডিয়ামৰ পৰা কিছু দূৰৈত স্কুটাৰত অহা এজন বন্দুকধাৰীয়ে মুকলিকৈ গুলীচালনা কৰিছিল।
বেলজিয়ামৰ প্ৰধানমন্ত্ৰী আলেকজেণ্ডাৰ ডি ক্ৰুৱে ছুইডেনৰ নাগৰিকক লক্ষ্য কৰি আক্ৰমণ কৰা বুলি মন্তব্য কৰে। সমগ্ৰ ঘটনাটোত স্তম্ভিত হৈ ক্ৰুৱে ছুইডেনৰ কাষত থিয় দিয়াৰ বাৰ্তা দিছে। এই আক্ৰমণক তেওঁ সন্ত্ৰাসবাদ বুলিও অভিহিত কৰি সন্ত্ৰাসবাদৰ বিৰুদ্ধে যৌথ যুঁজৰ বাৰ্তা প্ৰদান কৰে।
আনহাতে, এই আক্ৰমণৰ পিছত ছুইডেনৰ খেলুৱৈসকলে খেলিবলৈ প্ৰস্তুত নহ’ল। স্বাভাৱিকতে মেচখন পৰিত্যক্ত হৈ পৰিল।
লগতে পঢ়কঃ আজি সমলিংগ বিবাহৰ আবেদনৰ চূড়ান্ত ৰায় ঘোষণা কৰিব উচ্চতম ন্যায়ালয়ে
ইপিনে, ইজৰাইল আৰু হামাছৰ মাজত যুদ্ধ অব্যাহত আছে। ইয়াৰ মাজতে বেলজিয়ামত বন্দুকধাৰীৰ আক্ৰমণ আৰু ছুইডেনৰ দুজন নাগৰিকৰ মৃত্যুৱে স্বাভাৱিকতে সন্ত্ৰাসবাদী আক্ৰমণৰ আশংকা বৃদ্ধি কৰিছে। সন্ত্ৰাবাদী আক্ৰমণৰ পিছত ব্ৰাছেলছ চহৰত আৰক্ষীয়ে সতৰ্কতা জাৰি কৰে।
