বৃহস্পতিবাৰে পুৱাই সংঘৰ্ষত কঁপি উঠে কাশ্মীৰ উপত্যকা। কাশ্মীৰৰ ৰাজৌৰী জিলাৰ এটা সেনা ঘাটিত পুৱতি নিশা সেনাৰে হোৱা সংঘৰ্ষত কমেও দুজন সন্ত্ৰাসবাদী নিহত হয়। এই ঘটনাত ভাৰতীয় সেনাৰ তিনিজন সৈনিকো শ্বহীদ হয়।
সন্ত্ৰাসবাদীয়ে সেনাৰ শিবিৰত আত্মঘাতী আক্ৰমণৰ চেষ্টা কৰাৰ পিছতে ভয়ংকৰ সংঘৰ্ষ লাগে। দুয়োফালৰ পৰা সন্ত্ৰাসবাদীয়ে কৰা প্ৰচণ্ড গুলীবৰ্ষণত কমেও পাঁচজন জোৱান আহত হয়। আক্ৰমণত আহত সকলৰ ভিতৰত এজন বিষয়াক চিকিৎসাৰ বাবে ওচৰৰ চিকিৎসালয়লৈ লৈ যোৱা হৈছে।
তেওঁৰ অৱস্থা এই মুহূৰ্তত সংকটজনক বুলি কোৱা হৈছে। সেনাৰ শিবিৰটো জম্মু আৰু কাশ্মীৰৰ ৰাজৌৰীৰ দৰহাল অঞ্চলৰ পাৰগলত অৱস্থিত।
প্ৰতিৰক্ষা মন্ত্ৰালয়ৰ এজন মুখপাত্ৰই কয়, ” আজি পুৱা পাৰগল অঞ্চলত সন্ত্ৰাসবাদীৰে সেনাৰ সংঘৰ্ষ আৰম্ভ হয়।সংঘৰ্ষত তনিজন জোৱানৰ মৃত্যু ঘটাৰ লগতে দুই সন্ত্ৰাসবাদীকো নিধন কৰা হৈছে” ।জানিব পৰা মতে সন্ত্ৰাসবাদীসকলে সেনা শিবিৰৰ ভিতৰলৈ সোমাই যাবলৈ চেষ্টা কৰিছিল ।
কিন্তু সেনাই সেই চেষ্টা বিফল কৰে।জম্মুৰ এডিজিপি মুকেশ সিঙেও আক্ৰমণৰ কথা নিশ্চিত কৰি কৈছে, “সন্ত্ৰাসবাদীয়ে ৰাজৌৰীৰ দৰহাল অঞ্চলৰ পাৰগলত সেনা শিবিৰৰ বেৰ পাৰ হ’বলৈ চেষ্টা কৰিছিল।ফলত গুলীৰ বিনিময় হৈছিল।”
এই ঘটনাৰ পিছতে সেনাৰ ১৬ কৰ্পৰ কমাণ্ডাৰ লেফটেনেণ্ট জেনেৰেল মনজিন্দৰ সিঙে সমগ্ৰ পৰিস্থিতি নিৰীক্ষণ কৰি আছে। নিৰাপত্তা বাহিনীৰ জোৱানে অঞ্চলটো ঘেৰাও কৰিছে আৰু সেনাৰ অতিৰিক্ত দল সেই স্থানলৈ প্ৰেৰণ কৰা হৈছে। সেনাৰ সূত্ৰই প্ৰকাশ কৰা মতে নিহত সন্ত্ৰাসবাদী দুজন কাশ্মীৰী পণ্ডিত ৰাহুল ভাট আৰু টিভি এংকৰ অমৰিন ভাটৰ হত্যাত জড়িত আছিল।
