অসমীয়া নৱবৰ্ষৰ তৃতীয়টো দিনত নগাঁও জিলাৰ চামগুৰিৰ হদহদী জলপ্ৰপাতত দুজন যুৱকৰ সলিল সমাধি ঘটা ঘটনাই সমগ্ৰ জিলাখনতে শোকৰ ছাঁ পেলাইছে।
জানিব পৰা মতে আজি দুপৰীয়াৰ ভাগত নগাঁও চহৰৰ ঢাকাইপট্টি, আমিনপট্টি আৰু কছলুখোৱা অঞ্চলৰ পৰা দুখন বাইকত তিনি যুৱক আৰু এগৰাকী যুৱতীৰ এটি দলে চামগুৰিৰ লুংচুং চাহ বাগিচা অঞ্চলত অৱস্থিত বনভোজস্থলী হিচাপে পৰিচিত হদহদী জলপ্ৰপাতলৈ আহিছিল।
হদহদী জলপ্ৰপাতৰ সৌন্দৰ্য উপভোগ কৰি যুৱক কেইজনে পানীত জলকেলি কৰিবলৈ ধৰে।। এনেতে হঠাৎ দুজন যুৱক সন্ধানহীন হৈ পৰাত দলটোৰ আন কেইগৰাকীয়ে হুলস্থূল কৰিবলৈ ধৰে।
নিলগত থকা স্থানীয় লোকে গম পাই ঘটনাস্থলীত উপস্থিত হৈ এজন যুৱকক উদ্ধাৰ কৰে।
এই ঘটনাৰ খবৰ পাই চামগুৰি থানাৰ আৰক্ষীসহ সোনাৰিবালিৰ অগ্নিনিৰ্বাপক বাহিনীৰ দল ঘটনাস্থলীত উপস্থিত হৈ ৰাইজৰ সহযোগত আনজন সন্ধানহীন যুৱককো মৃত অৱস্থাত উদ্ধাৰ কৰিবলৈ সক্ষম হয়।
সলিল সমাধি ঘটা যুৱক দুজন ক্ৰমে নগাঁও টাউনৰ ছাজাদুল হক (২৪) আৰু ৰাজ বৰা(২৪) বুলি জানিব পৰা গৈছে।
