লকডাউনৰ মাজতে তামিলনাডুৰ পৰা মটৰ চাইকেলেৰে উপস্থিত হ’ল অসমৰ দুজন যুৱক!
কৰ’না সংক্ৰমণ প্ৰতিৰোধ কৰাৰ বাবে কেন্দ্ৰ তথা ৰাজ্য চৰকাৰে আপ্ৰাণ চেষ্টা চলাই থকাৰ সময়তে বিভিন্ন স্থানৰ লোকসকলে পৰা নিজ ঘৰলৈ উভতাৰ বাবে অস্থিৰ হৈ পৰিছে।
দেশত সম্পূৰ্ণ লকডাউন চলি থকা সময়ত কোনোৱে ৰাস্তাৰে খোজকাঢ়ি কিম্বা বাইকত যিকোনো উপায়ে ঘৰমুৱা হৈছে।
লকডাউনৰ মাজতে, অসমৰ দুজন যুৱকেও তামিলনাডুৰ পৰা মটৰচাইকেলেৰে আহি গোলাঘাটৰ নাওজানত উপস্থিত হৈছে।
২৯ মাৰ্চত তেওঁলোকে সুদীৰ্ঘ পথ অতিক্ৰম কৰি আহি ঘৰ পাইছেহি।
অৱশ্যে, সচেতনভাৱে ঘৰত উপস্থিত হৈয়েই তেওঁলোক প্ৰথমতে ডাক্তৰৰ শৰণাপন্ন হৈছে। বৰ্তমান দুয়োজনেই ১৪ দিনৰ বাবে হোম কোৱাৰেন্টাইনত আছে।
জটিল এই পৰিস্থিতিৰ মোকাবিলাৰ বাবে দেশৰ বিভিন্ন শিল্প উদ্যোগ, বলীউদ, ৰতন টাটাৰ দৰে বিশিষ্ট ব্যক্তিৰ লগতে সাধাৰণ লোকসকলো আগবাঢ়ি আহিছে।
বিশ্বনাথ জিলাৰ গহপুৰৰ খেতিয়ক গংগা কটকীয়ে তেওঁৰ পৰি থকা ২০ বিঘা ভূমি হাস্পাতল নিৰ্মাণৰ বাবে চৰকাৰক আগবঢ়োৱাৰ প্ৰস্তাৱ দিছে।
দেশৰ এই বিপৰ্যয়ৰ সময়ত সেৱা আগবঢ়োৱাৰ বাবে বহু লোক আগবাঢ়ি আহিছে।
আনহাতে, স্বাস্থ্য মন্ত্ৰী হিমন্ত বিশ্ব শৰ্মাই গুৱাহাটী, ডিব্ৰুগড় আৰু শিলচৰ মেডিকেল কলেজ খালী কৰি তাত কেবল কৰ’নাৰ চিকিৎসাৰ বাবে প্ৰস্তুত কৰি ৰখাৰ সিদ্ধান্ত গ্ৰহণ কৰিছে।
অসমত এতিয়ালৈকে কোনো কৰ’না আক্ৰান্তৰ ঘটনা পোহৰলৈ অহা নাই যদিও ৰাজ্যৰ স্বাস্থ্য বিভাগৰ ফালৰ পৰা সকলোধৰণৰ ব্যৱস্থা যুদ্ধকালীন ক্ষিপ্ৰতাৰে অব্যাহত ৰখা হৈছে।