হিংসাৰ জুইত জাহ গৈছে মণিপুৰ আৰু হাৰিয়ানা। গোষ্ঠীগত সংঘৰ্ষই বিগত তিনিমাহ ধৰি মণিপুৰ অশান্ত কৰি ৰখাৰ ষিছত এতিয়া সাম্প্ৰদায়িক সংঘৰ্ষই দগ্ধ কৰিছে হাৰিয়ানাক। বিজেপি শাসিত এই দুয়োখন প্ৰদেশতে এতিয়া জনসাধাৰণৰ নিৰাপত্তা সংকটাপন্ন হৈ পৰিছে।
এনে অৰাজক পৰিস্থিতিৰ মাজতে শাসকীয় বিজেপি চৰকাৰক তীব্ৰ সমালোচনা কৰি শিৱসেনাৰ মুৰব্বী উদ্ধৱ থাকৰেই এয়া ৰাম ৰাজ্য নে বুলি প্ৰশ্ন কৰিছে। “প্ৰথমে মণিপুৰত, এতিয়া হাৰিয়ানাত; এইয়া ৰাম ৰাজ্য নেকি নে নহয়?”- বিজেপিক কটাক্ষ কৰি থাকৰেই কয়।
মণিপুৰৰ প্ৰসঙ্গ উত্থাপনেৰে থাকৰেই লগতে কয়, “চৰকাৰে তাত কি কৰিছে? মই বাৰে বাৰে মণিপুৰৰ পৰিস্থিতিৰ বিষয়ে সুধিছো। মণিপুৰৰ ৰাজ্যপাল এগৰাকী মহিলা আৰু তাত মহিলাৰ ওপৰত অত্যাচাৰ হৈছে। ৰাজ্য চৰকাৰৰ ফালৰ পৰা একো হোৱা নাই। ক’ত আছে চৰকাৰৰ ডাবল ইঞ্জিন?”
ইফালে বিজেপিৰ মহাৰাষ্ট্ৰৰ বিধায়ক নিতেশ ৰাণেই বিধানসভাত দিয়া এক বক্তব্যৰ প্ৰতিক্ৰিয়া প্ৰকাশ কৰি উদ্ধৱ থাকৰেই বিজেপিয়ে মহিলাক সুৰক্ষা দিব নোৱাৰে বুলি মন্তব্য কৰে আৰু সেয়ে বিজেপিৰ পৰা উদ্ভট মন্তব্যহে আশা কৰিব পাৰি বুলি কটাক্ষ কৰে থাকৰেই।
মণিপুৰত মহিলাৰ ওচৰত চলা অকথ্য নিৰ্যাতনৰ দোহাই দি থাকৰেই হিন্দুত্বৰ কথা কোৱা বিজেপিয়ে দেশৰ নাৰীসকলক ৰক্ষা কৰিবলৈও চেষ্টা নকৰে বুলি মন্তব্য কৰে।
