অসমৰ আকাশ-বতাহ জুবিন গাৰ্গৰ দুখত সেমেকি থকাৰ সময়তে আহিছে আন এক দুখবৰ জম্মু-কাশ্মীৰৰ উধামপুৰ জিলাত নিৰাপত্তা বাহিনী আৰু সন্ত্ৰাসবাদীৰ মাজত সংঘৰ্ষৰ সময়ত শ্বহীদ হয় এজন ভাৰতীয় সেনা জোৱান। শুকুৰবাৰে সন্ধিয়া আৰম্ভ হোৱা বিশেষ অভিযান চলি থকা অৱস্থাতে সন্ত্ৰাসবাদীৰ গুলীত আহত হয়।
উল্লেখ্য যে উধামপুৰৰ উচ্চভূমি দুডু-বসন্তগড় অঞ্চল আৰু ডোডাৰ ভাদেৰৱাহৰ সেউজ ধাৰ বনাঞ্চলত সেনা আৰু জম্মু-কাশ্মীৰ আৰক্ষীৰ বিশেষ অভিযান গ্ৰুপ (SOG)-ৰ যৌথ উদ্যোগত অভিযান চলি আছিল। এই সময়তে আত্মগোপন কৰি থকা সন্ত্ৰাসবাদীয়ে হঠাৎ গুলীচালনা কৰে। গুলীত এজন সেনা জোৱান গুৰুতৰভাবে আহত হয় আৰু পৰৱৰ্তী সময়ত জোৱানজন চিকিৎসালয়লৈ লৈ যোৱাৰ সময়তে মৃত্যুবৰণ কৰে।
ঘটনাৰ পাছত সমগ্ৰ অঞ্চলত কঠোৰ নিৰাপত্তা ব্যৱস্থা স্থাপন কৰা হয়। শনিবাৰে পুৱাৰ পৰা পুনৰ অভিযান আৰম্ভ হয়। সন্দেহ কৰা হৈছে যে দুই তিনিজন সন্ত্ৰাসবাদী এতিয়াও বনাঞ্চলত লুকাই আছে। তেওঁলোকক বিচাৰি উলিয়াবলৈ ড্ৰ’ন আৰু ডগ স্কোৱাডৰ সহায় লোৱা হৈছে বুলি সদৰী কৰিছে।
সেনা সূত্ৰই জনোৱা অনুসৰি, উধামপুৰ অঞ্চলত দুই তিনিজন জৈছ-ই-মহম্মদৰ সন্ত্ৰাসবাদী লুকাই থকাৰ তথ্য পোৱা গৈছে। কিছুদিন ধৰি এই দলটোৱে সীমান্ত পাৰ হৈ অনুপ্ৰৱেশৰ চেষ্টা চলাই আছিল, যদিও নিৰাপত্তা বাহিনীয়ে সেই প্ৰচেষ্টা ব্যৰ্থ কৰে। এই সময়তে শ্ৰীনগৰসহ বিভিন্ন ঠাইত একে সময়তে তালাচী অভিযান আৰম্ভ কৰা বুলি সদৰী কৰিছে।
