জাতিৰ হিয়াৰ আমঠু, প্ৰাণৰ শিল্পী জুবিন গাৰ্গৰ নশ্বৰ দেহ আজি শেহনিশা বা কাইলৈ পুৱা অসম পাবহি। সৰুসজাইস্থিত অর্জুন ভোগেশ্বৰ বৰুৱা ক্রীড়া প্ৰকল্পৰ চৌহদত শিল্পীগৰাকীক ৰাজহুৱা শ্রদ্ধাঞ্জলি জনোৱাৰ বাবে অসম চৰকাৰে যাৱতীয় পদক্ষেপ গ্রহণ কৰিছে। মুখ্যমন্ত্রী হিমন্ত বিশ্ব শর্মাই আজি পুৱা আৰু বিয়লিৰ ভাগত দুবাৰকৈ সৰুসজাইত উপস্থিত হৈ এই বিষয়ক প্রস্তুতিৰ বুজ লয়। তেওঁ প্রশাসন আৰু আৰক্ষীৰ শীৰ্ষ বিষয়ববীয়াসকলৰ সৈতে বৈঠকত মিলিত হৈ সামগ্রিক ব্যৱস্থাৱলীৰ পৰ্যালোচনা কৰে। জনপ্রিয় শিল্পীগৰাকীক গুণমুগ্ধ ৰাইজে শেষ দৰ্শন কৰা আৰু শ্রদ্ধাঞ্জলি জনোৱাৰ সমগ্ৰ ব্যৱস্থাৱলী যাতে শৃংখলাবদ্ধ আৰু সুচাৰুৰূপে পৰিচালিত হয়, তাৰ বাবে প্রয়োজনীয় পদক্ষেপ গ্ৰহণৰ বাবে মুখ্যমন্ত্রী শর্মাই প্রশাসনিক বিষয়ববীয়াসকলক যাবতীয় নির্দেশনা প্রদান কৰে। শ্রদ্ধাঞ্জলিস্থলীত উপযুক্ত পার্কিঙৰ ব্যৱস্থা, খোৱাপানী, অনাময়ৰ সু-সুবিধা, চিকিৎসাৰ ব্যৱস্থা আদিও পর্যাপ্ত ৰূপত উপলব্ধ কৰাবলৈ তেওঁ বিভাগীয় বিষয়াসকলক নির্দেশ দিয়ে। আনহাতে যান-জট নিয়ন্ত্ৰণৰ স্বাৰ্থত ৰাজহুৱা শ্রদ্ধাঞ্জলিৰ সময়ছোৱাত ক্রীড়া প্ৰকল্পৰ কাষৰ ৰাষ্ট্ৰীয় ঘাইপথেদি গধুৰ যান-বাহনৰ চলাচল নিয়ন্ত্ৰণৰ পদক্ষেপ ল’বলৈও তেওঁ যান-বাহন আৰক্ষীক নির্দেশ দিয়ে।
উল্লেখযোগ্য যে শিল্পী জুবিন গাৰ্গৰ নশ্বৰ দেহ আজি মাজনিশা ছিংগাপুৰৰ পৰা নতুন দিল্লীত আহি পোৱাৰ সম্ভাৱনা আছে। নতুন দিল্লীৰ বিমান বন্দৰত শিল্পীগৰাকীৰ নম্বৰ দেহ আনুষ্ঠানিকভাৱে গ্ৰহণৰ বাবে মুখ্যমন্ত্রী শর্মা আজি বিয়লি নতুন দিল্লীলৈ ৰাওনা হৈছে। নতুন দিল্লী আহি পোৱাৰ পাছতেই শিল্পীগৰাকীৰ পাৰ্থিৱ শৰীৰ পোনে পোনে গুৱাহাটীলৈ লৈ অনাৰ ব্যৱস্থা কৰা হ‘ব। শিল্পীগৰাকীৰ শেষকৃত্য সম্পন্ন কৰাৰ সময় আৰু স্থান সম্পর্কে তেখেতৰ পৰিয়াল, ঘনিষ্ঠ শিল্পীসকল, জাতীয় অনুষ্ঠান তথা আন সংশ্লিষ্টসকলৰ সৈতে আলোচনা কৰি চূড়ান্ত সিদ্ধান্ত গ্রহণ কৰা হ’ব বুলি মুখ্যমন্ত্রীয়ে সংবাদ মাধ্যমৰ আগত অৱগত কৰে।
সৰুসজাইত আজি এই সম্পর্কীয় পর্যালোচনাৰ সময়ত শিক্ষা আদি বিভাগৰ মন্ত্রী ডাঃ ৰণোজ পেণ্ড, সাংস্কৃতিক পৰিক্ৰমা আদি বিভাগৰ মন্ত্ৰী বিমল বৰা, শক্তি আদি বিভাগৰ মন্ত্রী প্রশান্ত ফুকন, কেন্দ্ৰীয় চৰকাৰৰ বৈদেশিক পৰিক্ৰমা দপ্তৰৰ ৰাজ্যিক মন্ত্রী পৱিত্ৰ মাৰ্ঘেৰিটাৰ লগতে মুখ্য সচিব আৰু আৰক্ষী সঞ্চালকপ্রধানকে ধৰি ৰাজ্যিক প্রশাসন, অসম আৰক্ষী আৰু লোক নির্মাণ, সাংস্কৃতিক পৰিক্ৰমা আদি বিভিন্ন বিভাগৰ শীৰ্ষ বিষয়াসকল উপস্থিত আছিল।
