উৱেফা চেম্পিয়নচ্ লীগত আজি জয়ৰ মুখ দেখিছে ফুটবল ক্লাৱ আজাক্স, এটলেটিকো মাদ্ৰিদ, বৰুছিয়া দৰ্টমুণ্ড, পিএছজি আৰু লিভাৰপুলে।
আজি আজাক্স বনাম বেচিক্টাচৰ খেলখনত আজাক্স দলে ২-০ ব্যৱধানত জয়ী হয়। দলৰ হৈ ষ্টিভেন বাৰগুইচ আৰু চেবাষ্টিয়ান হেলাৰে এটাকৈ গল স্ক’ৰ কৰে।
লীগৰ আন এখন খেলত এটলেটিকো মাদ্ৰিদে পৰাস্ত কৰে ইটালীয়ান ক্লাৱ এচি মিলানক। খেলখনত ৰাফায়েল লিয়াওৰ গলেৰে ২০ মিনিটতে মিলানে অগ্ৰগতি লাভ কৰিছিল যদিও খেলৰ ৮৪ মিনিটত এণ্টনিঅ’ গ্ৰিজমেনৰ গলেৰে মাদ্ৰিদে সমতা স্থাপন কৰে। পুনৰ খেলৰ ইনজুৰি টাইমত ছুৱাৰেজে এটা গল স্ক’ৰ কৰি মাদ্ৰিদৰ জয় নিশ্চিত কৰে।
পৰ্তুগীজ ক্লাব স্প’ৰ্টিঙক ১-০ গলত পৰাস্ত কৰে জাৰ্মানীৰ ক্লাব দৰ্টমুণ্ডে। খেলৰ ৩৭ মিনিটত দৰ্টমুণ্ডৰ দ’নিয়েল মালেনে নিৰ্ণায়ক গলটো দিয়ে।
তাৰকাসমৃদ্ধ পিএছজি দলেও এইবছৰৰ চেম্পিয়নচ্ লীগত নিজৰ প্ৰথম জয়ৰ মুখ দেখিছে। প্ৰিমিয়াৰ লীগৰ শক্তিশালী দল মানচেষ্টাৰ চিটিক ফৰাচী ক্লাবটোৱে পৰাস্ত কৰে ২-০ ব্যৱধানত। খেলৰ ৮ মিনিটতে পিএছজিৰ হৈ ইদ্ৰিছা গুৱেই দলৰ হৈ প্ৰথমটো গল কৰাৰ পিছত তাৰকা ফুটবলাৰ মেছিয়ে ৭৪ মিনিটত দলৰ হৈ দ্বিতীয়টো গল দিয়ে। উল্লেখ্য যে বাৰ্চিলোনা এৰি পিএছজিত যোগ দিয়াৰ পিছত আৰ্জেণ্টিনাৰ খেলুৱৈ গৰাকীৰ নতুন ক্লাবৰ হৈ এইটো প্ৰথমটো গল।
লীগৰ আন এখন খেলত পৰ্তুগীজ ক্লাব পৰ্তুক ৫-১ গলত বিধ্বস্ত কৰিছে লিভাৰপুলে। লিভাৰপুলৰ তাৰকা ষ্ট্ৰাইকাৰত্ৰয় মহম্মদ ছালাহ, চাডিঅ’ মানে আৰু ৰবাৰ্ট’ ফিৰ্মিন’- এ পৰ্তুৰ ডিফেঞ্চ লাইনক আজি থকাসৰকা কৰি তোলে। ছালাহ আৰু ফিৰ্মিন’ – এ দুটাকৈ গল স্ক’ৰ কৰাৰ লগতে এটা গল দিয়ে মানেই।
আনহাতে আজি অঘটনৰ স্বীকাৰ হৈ পৰাজয়ৰ মুখ দেখিছে শক্তিশালী ৰিয়েল মাদ্ৰিদে। দলটোক ২-১ গলত পৰাস্ত কৰে অখ্যাত মালডৌভিয়ান ক্লাব শ্বেৰিফে। শ্বেৰিফৰ হৈ য়াক্সিবয়েভ আৰু থিল- এ গল দুটা দিয়াৰ বিপৰীতে মাদ্ৰিদৰ হৈ পেনাল্টিত একমাত্ৰ গলটো স্ক’ৰ কৰে বেঞ্জিমাই।
চাখটাৰ ডনেটস্কৰ সৈতে গলশূন্য ড্ৰ খেলি পইণ্ট ভগাই লবলৈ বাধ্য হৈছে ইণ্টাৰ মিলানে। তুলনামূলকভাৱে দুৰ্বল চাখটাৰৰ বিৰুদ্ধে প্ৰায় নিষ্প্ৰভ দেখা গ’ল ছিৰি এ- ৰ চেম্পিয়ন দলটোক।
গ্ৰুপ Aৰ আন এখন খেলত ক্লাব ব্ৰুগে আৰবি লেইপজিগক ২-১ গলত পৰাস্ত কৰে।
