ভিডিঅ’ এপৰ সহায়েৰে চীনৰ অৱদমিত মুছলমানৰ অভিনৱ প্ৰতিবাদ

চীনৰ উইঘুৰ (Uighur) মুছলমানসকলে তেওঁলোকৰ দুৰ্দশাক সমাজৰ আগত প্ৰকাশ কৰাৰ বাবে গ্ৰহণ কৰা এক ব্যতিক্ৰমী পদক্ষেপে বিভিন্নজনৰ দৃষ্টি আকৰ্ষণ কৰিবলৈ সক্ষম হৈছে।

তেওঁলোকে জনপ্ৰিয় ভিডিঅ’ এপ Tik Tok সদৃশ Douyin নামৰ এপটোৰ জৰিয়তে তেওঁলোকৰ হেৰাই যোৱা আপোনজনৰ ফটোসহ ভিডিঅ’ প’ষ্ট কৰে।

এক সূত্ৰত প্ৰকাশিত বাতৰি মতে, উইঘুৰ মুছলমানসকলে বিগত কেইটামান বছৰত নিখোজ হৈ পৰা তেওঁলোকৰ পৰিয়াল বা বন্ধুৰ ফটোৰ সৈতে ভিডিঅ’ প’ষ্ট কৰাটো শেহতীয়াভাৱে Douyinত এক ট্ৰেণ্ডৰ সৃষ্টি কৰিছে।

উত্তৰ-পশ্চিম চীনৰ এখন স্বাত্তশাসিত প্ৰদেশ চিনজিয়াং (Xinjiang)ত সাধাৰণতে বাস কৰা উইঘুৰ মুছলমানসকল হৈছে চিনৰ এটা সংখ্যালঘু সম্প্ৰদায়।

সংবাদ মাধ্যমৰ বাতৰি আৰু মানৱ অধিকাৰ সংস্থাসমূহৰ মতে হাজাৰ হাজাৰ উইঘুৰ মুছলমানক চীন চৰকাৰে ডিটেনশ্যন কেম্পত বন্দী কৰি ৰাখিছে।

Douyin এপত প্ৰকাশ পোৱা ভিডিঅ’ বিলাকত আৱেগবিহ্বল হৈ পৰা পোষ্টকৰ্তাসকলে তেওঁলোকৰ সেমেকি উঠা চকুৰ পানী ধৰি ৰাখিব খোজা দেখা যায়।

লক্ষণীয়ভাৱে উক্ত এপটো যথেষ্ট ‘কঠোৰ’ বুলি জনাজাত চীন চেঞ্চৰশ্বিপে বান্ধি দিয়া বাধা-নিষেধৰ আওতাৰ ভিতৰত পৰে।

টুইটাৰ আদি সামাজিক মাধ্যমত উইঘুৰসকলৰ উক্ত পদক্ষেপে সম্প্ৰতি যথেষ্ট চৰ্চা লাভ কৰা দেখা গৈছে।

আইনৰ বাধা-নিষেধ উলংঘা নকৰাকৈ শোষন, অৱদমনৰ বিৰুদ্ধে ভাৱ প্ৰকাশৰ ক্ষেত্ৰত তেওঁলোকে দেখুওৱা এই ‘প্ৰতিবাদ’ আনৰ বাবেও এক নিদৰ্শন হৈ উঠিব পাৰে বুলি বিভন্নজনে মন্তব্য কৰিছে।

তলত টুইটাৰত পোষ্ট কৰা তেনে এটা ভিডিঅ’ দিয়া হ’ল

在我们家乡的维吾尔人冒着生命危，险通过无标题的都音视频方式为在集中营里的亲戚作证
不知道怎么回事，好象他们也知道了作证能救他们，几天里面上百个视频上传，让人心痛 pic.twitter.com/BYQBFN6L59

— Mehmet jan (@Mehmetjan5) August 19, 2019