ব্ৰিটেইনত দ্বিতীয়বাৰৰ বাবে পুনৰ লকডাউন ঘোষণা কৰিছে দেশখনৰ প্ৰধান মন্ত্ৰী বৰিছ জনছনে।
শনিবাৰে ডাউনিং ষ্ট্ৰীটত এখন সংবাদমেলত প্ৰধান মন্ত্ৰীগৰাকীয়ে এমাহৰ বাবে (তিনি-চাৰি সপ্তাহ) লকডাউনৰ কথা ঘোষণা কৰে।
বাতৰি অনুসৰি, অহা ৫ নৱেম্বৰ বৃহস্পতিবাৰৰ পৰা এই লকডাউন বলবৎ হ’ব।
জনছনে লগতে কয় যে এইবাৰৰ খ্ৰীষ্টমাছ ‘বহুত পৃথক’ হ’ব পাৰে। কিন্তু তেওঁ আশা প্ৰকাশ কৰে যে এই পদক্ষেপৰ ফলত ভৱিষ্যতে পৰিয়ালৰ সকলোৱে মিলিত হোৱাৰ সুবিধা পাব।
লকডাউনৰ সময়ছোৱাত ৰেষ্টুৰেন্ট, পাব, জিমৰ লগতে সাধাৰণ দোকান-পাহাৰ বৃহস্পতিবাৰৰ পৰা চাৰি সপ্তাহৰ বাবে বন্ধ থাকিব।
আনহাতে, প্ৰথম পৰ্যায়ৰ লকডাউনৰ দৰে এইবাৰ স্কুল-কলেজ আদি শিক্ষানুষ্ঠান বন্ধ নাৰাখি ইচ্ছা কৰিলে খোলা ৰাখিব পাৰিব।
অহা ২ ডিচেম্বৰৰ পাছত লকডাউন শিথিল কৰা হ’ব পাৰে বুলিও প্ৰধান মন্ত্ৰীগৰাকীয়ে ইংগিত দিয়ে।
শেহতীয়া তথ্য অনুসৰি, দেশখনত শনিবাৰে পুৱালৈকে মুঠ ১০লাখ, ১১হাজাৰ ৬৬০জন লোক কৰ’নাত আক্ৰান্ত হৈছে। তদুপৰি, এতিয়ালৈকে দেশখনত কৰ’নাৰ ফলত ৪৬হাজাৰ ৫৫৫জন লোকৰ মৃত্যু হৈছে।
