শেহতীয়াকৈ ৰাছিয়াই সমগ্ৰ ইউক্ৰেইনত একাধিক ড্ৰ’ন আৰু মিছাইল নিক্ষেপ কৰিছিল। এইবাৰ ইউক্ৰেইনেও ইয়াৰ প্ৰত্যুত্তৰ দিছে। সংবাদ সংস্থাৰ সূত্ৰ অনুসৰি ইউক্ৰেইনৰ ছিকিউৰিটি চাৰ্ভিছে দেওবাৰে ৰাছিয়াৰ চাৰিটা বিমান ঘাটি আৰু দুটা বিমানবন্দৰত ব্যাপক ড্ৰোন আক্ৰমণ চলায়।
ইয়াৰ ভিতৰত ৰাছিয়াৰ বোমাৰু বিমান Tu-95, Tu22M3 আৰু A-50কে ধৰি ৪০খনতকৈও অধিক ৰাছিয়াৰ যুদ্ধবিমান ধ্বংস হয়। ইতিমধ্যে ৰাছিয়াই ইয়াৰ উত্তৰ দিবলৈ এখন বৈঠক অনুষ্ঠিত কৰিছে। আন্তঃৰাষ্ট্ৰীয় মহলৰ মতে, যোৱা তিনি বছৰৰ ভিতৰত ৰাছিয়া-ইউক্ৰেইন যুদ্ধৰ আকাশীপথত এইটোৱেই হৈছে আটাইতকৈ ডাঙৰ আক্ৰমণ।
এই আক্ৰমণ সন্দৰ্ভত এতিয়াও আনুষ্ঠানিকভাৱে কোনো কথা ঘোষণা কৰা নাই ৰাছিয়াই। অৱশ্যে ৰাছিয়াৰ আৰ্খাংগেলস্ক অঞ্চলৰ গৱৰ্ণৰ ইগ’ৰ ক’ভজেভে সংবাদ সংস্থাটোৰ আগত স্বীকাৰ কৰিছে যে ইউক্ৰেইনে আক্ৰমণ কৰিছিল। জানিব পৰা মতে, ইউক্ৰেইনে ৰাছিয়াৰ পাৰমাণৱিক অস্ত্ৰ মজুত থকা অলেনা বিমান ঘাটিতো ড্ৰ’ন আক্ৰমণ চলাইছিল।
এই আক্ৰমণৰ ফলত ৰাছিয়াৰ কেইবাটাও সামৰিক ঘাটিত জুই লাগিছিল। কেইবাঠাইতো বিস্ফোৰণো সংঘটিত হয়। ইতিমধ্যে ছ’চিয়েল মিডিয়াত সেইবোৰ ভাইৰেল হৈ পৰিছে। তাত দেখা গৈছে যে ৰাছিয়াৰ সেনাই ড্ৰ’ন আক্ৰমণৰ উৎস চিনাক্ত কৰি তেওঁলোকক নিষ্ক্ৰিয় কৰিছে। বৰ্তমান ক্ষতিগ্ৰস্ত অঞ্চলৰ পৰা আহত জোৱান আৰু সাধাৰণ নাগৰিকক উলিয়াই অনাৰ কাম চলি আছে।
যোৱা শনিবাৰে নিশাৰ পৰা দেওবাৰে পুৱালৈকে ৰাছিয়াই সমগ্ৰ ইউক্ৰেইনত ৩৬৭টা ড্ৰোন আৰু মিছাইল নিক্ষেপ কৰে। এই আক্ৰমণৰ ফলত ৰাজধানী কিয়েভকে ধৰি কেইবাখনো চহৰৰ ব্যাপক ক্ষতিসাধন হয়। ইউক্ৰেইনৰ বায়ুসেনাই জনোৱা মতে, তেওঁলোকে ২৬৬টা ড্ৰ’ন আৰু ৪৫টা মিছাইল ধ্বংস কৰিছিল যদিও কেইবাটাও ইউক্ৰেইনৰ মাটিত পৰি যায়। এই আক্ৰমণৰ ফলত একাধিক লোকৰ মৃত্যু হয়। বহু লোক আহত হয়। এইবাৰ ৰাছিয়াৰ বিৰুদ্ধে তাৰ প্ৰতিশোধ ল’লে ইউক্ৰেইনে!
