কংগোৰ পূৰ্বাঞ্চলত এম ২৩ বিদ্ৰোহী গোটৰ সৈতে পাঁচ দিনীয়া যুঁজত ৭০০ লোকৰ মৃত্যু হৈছে বুলি ৰাষ্ট্ৰসংঘই প্ৰকাশ কৰিছে। ব্ৰিটিছ সংবাদ মাধ্যম বিবিচি আৰু আমেৰিকান সংবাদ মাধ্যম চিএনএনে তেওঁলোকৰ প্ৰতিবেদনত এই বাতৰি প্ৰকাশ কৰিছে।
ৰাষ্ট্ৰসংঘৰ সচিবৰ প্ৰধান মুখপাত্ৰ ষ্টেফান ডুজাৰিকৰ উদ্ধৃতি দি সংবাদ মাধ্যম দুটাই প্ৰকাশ কৰা অনুসৰি ২৬-৩০ জানুৱাৰীৰ ভিতৰত কংগোৰ পূব অংশত সংঘাত তীব্ৰতৰ হোৱাৰ পিছত মাত্ৰ পাঁচ দিনৰ ভিতৰতে ৭০০ৰো অধিক লোক নিহত হোৱাৰ লগতে ২৮০০ লোক আহত হৈছে।
বিবিচিৰ বাতৰি অনুসৰি এম ২৩ বিদ্ৰোহী সংগঠনটোৱে ইতিমধ্যে উত্তৰ কিভু প্ৰদেশৰ ৰাজধানী গোমা দখল কৰিছে। এতিয়া তেওঁলোক দক্ষিণ কিভু প্ৰদেশৰ ৰাজধানী বুকাভুৰ দিশে আগবাঢ়িছে।
ইয়াৰ পূৰ্বে ৰাষ্ট্ৰসংঘই প্ৰকাশ কৰা অনুসৰি যোৱা সপ্তাহত কংগোত বিদ্ৰোহীৰ সৈতে হোৱা সংঘৰ্ষত ১৩ জন শান্তিৰক্ষী সেন্য নিহত হৈছে।
এম ২৩ বা ২৩ মাৰ্চ কংগোৰ টুট্সি জনগোষ্ঠীৰ এটা সশস্ত্ৰ বিদ্ৰোহী গোট। এসময়ত ই কংগো সেনাৰ সৈতে কাম কৰিছিল। অৱশ্যে ১০ বছৰ পূৰ্বে কংগো সেনাৰ পৰা পৃথক হৈছিল। ২০২২ চনৰ পৰা এম ২৩ বিদ্ৰোহী সংগঠনে পূব কংগোৰ বিভিন্ন অঞ্চলৰ নিয়ন্ত্ৰণ দখল কৰিবলৈ আৰম্ভ কৰে।
বিবিচিয়ে জনোৱা মতে, চলিত বৰ্ষৰ আৰম্ভণিতে কংগো সেনা আৰু এম ২৩ বিদ্ৰোহীৰ মাজত যুদ্ধ তীব্ৰতৰ হৈ পৰিছিল।
ৰাষ্ট্ৰসংঘৰ তথ্য অনুসৰি চলিত বছৰতে সংঘাতৰ বাবে প্ৰায় ৪ লাখ লোকে ঘৰ-বাৰী এৰি পলায়ন কৰিছে।
