পূজাৰ বতৰতে সুখবৰ কঢ়িয়াই অসমৰ এটা অন্যতম উদ্যোগ তথা দেশৰ ভিতৰতে প্ৰথমটো গেছভিত্তিক সাৰ কাৰখানা নামৰূপ সাৰ কাৰখানাৰ চতুৰ্থটো গোট স্থাপনৰ ফাইলত চহী কৰিছে কেন্দ্ৰীয় সাৰ মন্ত্ৰীয়ে।
সাৰ কাৰখানাৰ অধ্যক্ষ আৰু পৰিচালন সঞ্চালক এছ ডি সিঙক মন্ত্ৰ্যালয়ৰ তৰফৰ পৰা বহু প্ৰত্যাশিত এই খবৰটো দিয়া হৈছে।
এতিয়া কেবিনেটে সিদ্ধান্ত দিলেই সাৰ কাৰখানাটোৰ চতুৰ্থ গোটটো নিৰ্মাণৰ বাবে পুঁজি বিনিয়োগৰ বিষয়টো আগ বাঢ়িব।
এই সুখবৰটোৱে সাৰ কাৰখানাটোত কৰ্মৰত শ্ৰমিকসকলৰ মনলৈও স্বাভাৱিকতেই আনন্দৰ জোৱাৰ আনিছে। মঙলবাৰে এই সন্দৰ্ভত সাৰ কাৰখানাৰ প্ৰৱেশদ্বাৰৰ সন্মুখত এখন সভা অনুষ্ঠিত হয়।
উক্ত সভাত ফাৰ্টিলাইজাৰ শ্ৰমিক য়ুনিয়নৰ সাধাৰণ সম্পাদক তিলেশ্বৰ বড়া আৰু ফাৰ্টিলাইজাৰ ৱৰ্কাৰ্ছ য়ুনিয়নৰ সাধাৰণ সম্পাদক মুগ্ধপ্ৰাণ মহন্তই বক্তব্য দাঙি ধৰে।
উল্লেখযোগ্য যে ব্ৰহ্মপুত্ৰ ভেলি ফাৰ্টিলাইজাৰ ক’ৰ্পৰেইশ্যন লিমিটেডৰ (Brahmaputra Valley Fertilizer Corporation Limited (BVFCL)) অধীনত থকা নামৰূপ সাৰ কাৰখানাটোৰ তিনিটা গোট আছিল যদিও বৰ্তমান ইয়াৰ দুটা গোটহে (নামৰূপ-২ (স্থাপিত ১৯৭৬) আৰু নামৰূপ-৩(স্থাপিত ১৯৮৭)) উৎপাদনক্ষম হৈ আছে। এই কেইটাৰো উৎপাদন সন্তোষজনক নহয়। আনহাতে ১৯৬৯ চনতে স্থাপন কৰা দেশৰ ভিতৰতে প্ৰথমটো গেছভিত্তিক সাৰ উৎপাদন গোট (নামৰূপ-১) ১৯৮৬ চনৰ পৰাই বন্ধ হৈ আছে।
ফলত অত্যাধুনিক প্ৰযুক্তিৰ সৈতে চতুৰ্থটো স্থাপনৰ বাবে দীৰ্ঘদিন ধৰি দাবী তুলি আহিছে অসমৰ দল-সংগঠনে। পূৰ্বৰ মনমোহন চৰকাৰকো আছুকে ধৰি অসমৰ দল-সংগঠনে এই সন্দৰ্ভত স্মাৰকপত্ৰ দি আহিছিল। আনহাতে নামৰূপ সাৰ কাৰখানা শ্ৰমিক য়ুনিয়নেও দীৰ্ঘদিনৰ পৰা এই দাবী তুলি আহিছিল।
মন কৰিব লগীয়া যে বিগত লোকসভা নিৰ্বাচনী প্ৰচাৰৰ সময়ত মোদীৰ এইটো আছিল অন্যতম প্ৰতিশ্ৰুতি। অসমৰ ৰাইজক মোদীয়ে প্ৰতিশ্ৰুতি দিছিল যে তেওঁৰ দল যদি শাসনলৈ আহে তেন্তে নামৰূপ-৪ গোট স্থাপনেই হ’ব তেওঁৰ প্ৰথম কাম। তেওঁ লগতে প্ৰথম ১০০ দিনৰ ভিতৰতে এই কাম কৰা হ’ব বুলিও প্ৰতিশ্ৰুতি দিছিল।
