অমিত শ্বাহৰ নিৰ্বাচনী চমক! ৰাজ্যখনলৈ আহি ক’লে, মেঘালয় দেশৰ ‘এক নম্বৰ দুৰ্নীতিগ্ৰস্ত ৰাজ্য’

কেন্দ্ৰীয় গৃহ মন্ত্ৰী তথা জ্যেষ্ঠ বিজেপি নেতা অমিত শ্বাহে কৈছে যে মেঘালয় হৈছে দেশৰ “এক নম্বৰ দুৰ্নীতিগ্ৰস্ত ৰাজ্য”। বৃহস্পতিবাৰে মেঘালয়ৰ পশ্চিম গাৰো পাহাৰ জিলাৰ তুৰাত বিজেপিৰ এক বিশাল সমাৱেশ সম্বোধন কৰি অমিত শ্বাহে এই মন্তব্য কৰে।

কেন্দ্ৰীয় গৃহমন্ত্ৰী তথা বিজেপি নেতা অমিত শ্বাহে কয়, “আমি মেঘালয়ত এনপিপিৰ সৈতে মিত্ৰতা ভংগ কৰিছো যাতে বিজেপিয়ে সকলো আসনত প্ৰতিদ্বন্দিতা কৰিব পাৰে।”

ৰাজ্যখনত দুৰ্নীতি বন্ধ কৰাৰ প্ৰতিশ্ৰুতি দি শ্বাহে মেঘালয়ৰ জনসাধাৰণক বিজেপি প্ৰাৰ্থীসকলক ভোট দিবলৈ আহ্বান জনায়।

তুৰাত বিজেপিৰ জনসভাত ভাষণ দি অমিত শ্বাহে মেঘালয়ৰ জনসাধাৰণক আহ্বান জনায়, “ৰাজ্যখনত বিজেপিক শক্তিশালী দল কৰি তোলক আৰু আমি দুৰ্নীতি নিৰ্মূল কৰিম।”

তেওঁ লগতে কয়, “২০২২-২৩ বৰ্ষত অব্যৱস্থাপনা আৰু দুৰ্নীতিৰ বাবে ঘাটি আছিল ১৮৪৯ কোটি টকা। মেঘালয়ৰ দৰে এখন সৰু ৰাজ্যৰ বাবে ই এক বৃহৎ পৰিমাণ।”

কেন্দ্ৰীয় গৃহমন্ত্ৰী অমিত শ্বাহে কয়, “ভাৰতীয় ৰিজাৰ্ভ বেংকৰ প্ৰতিবেদন অনুসৰি মেঘালয় দেশৰ ভিতৰত মন্থৰ গতিত বিকশিত হৈ আছে।”

শ্বাহে কয়, “মোডী চৰকাৰে জনজাতীয় লোকসকলৰ কল্যাণ আৰু উন্নয়নৰ বাবে অভূতপূৰ্ব কাম কৰিছে।”

তেওঁ লগতে কয়, “মেঘালয়ৰ মানুহে বিশ্বাস কৰে যে কেৱল বিজেপিয়েহে দুৰ্নীতি বন্ধ কৰিব পাৰে আৰু ৰাজ্যখনলৈ প্ৰগতি আনিব।”