ক্ৰীড়া আৰু যুৱ কল্যাণ মন্ত্ৰালয়ৰ কেন্দ্ৰীয় ৰাজ্যিক মন্ত্ৰী কিৰেণ ৰিজিজু আৰু ভাৰতীয় ফুটবল দলৰ প্ৰাক্তন অধিনায়ক বাইচুং ভূটীয়াই সমগ্ৰ দেশত বিশেষকৈ উত্তৰ-পূবত দুঃসাহসিক ক্ৰীড়াক জনপ্ৰিয় কৰাৰ বাবে যুটি বান্ধিছে।
ফুটবলাৰ বাইচুং ভূটীয়াই জানিব দিয়া মতে, কিৰেণ ৰিজিজুই দুঃসাহসিক ক্ৰীড়া যেনে- স্কুবা ড্ৰাইভিং, মাউনটেইনেৰিং আৰু পাহাৰ বগোৱা আদি দেশত তথা উত্তৰ-পূবত জনপ্ৰিয় কৰি তোলাৰ বাবে কাম কৰি আহিছে।
কেন্দ্ৰীয় মন্ত্ৰীগৰাকীৰ ক্ৰীড়াক জনপ্ৰিয় কৰাৰ এনেধৰণৰ পদক্ষেপৰ প্ৰতি সহাৰি দি ভূটীয়াই দিল্লীত ৰিজিজুৰ লগত এখন স্কুবা ড্ৰাইভিং অনুষ্ঠানৰ ফ্লেগ অফ কাৰ্য্যসূচীতো অংশগ্ৰহণ কৰে।
দিল্লীৰ তালকোতৰা গাৰ্ডেনত অনুষ্ঠিত হোৱা স্কুবা ড্ৰাইভিং অনুষ্ঠানত বিশেষভাৱে সক্ষম খেলুৱৈসকলো উপস্থিত থাকে।
দুঃসাহসিক ক্ৰীড়াৰ বাবে প্ৰয়োজনীয় বিশেষ ট্ৰেইনিং, আত্মৰক্ষা আদিৰ বিষয়ে অনুষ্ঠানতটোত অংশগ্ৰহণ কৰা সেনা বাহিনীৰ প্ৰাক্তন বিষয়া তথা বিশেষজ্ঞ প্ৰশিক্ষক সকলে উপস্থিত খেল প্ৰেমীসকলক জনায়।
আনহাতে, আগন্তুক সময়ত দেশৰ বিভিন্ন প্ৰান্তত এনেধৰণৰ অনুষ্ঠান আয়োজন কৰা হ’ব বুলিও জানিব পৰা গৈছে।
ফ্লেগ অফ ডাইভত অংশলৈ ৰিজিজুই কয় ‘‘মই আজি ক্ল’জড ৱাটাৰ অপ-ব্লু ফ্ৰীডমত অংশ লবলৈ পাই সুখী অনুভৱ কৰিছো’’।
তদুপৰি, দেশৰ সক্ষম আৰু বিশেষভাৱে সক্ষম সকলো শ্ৰেণীৰ নাগৰিকৰ বাবে দুঃসাহসিক ক্ৰীড়াৰ প্ৰসাৰ ঘটোৱাৰ উদ্দেশ্যে ক্ৰীড়া আৰু যুৱ কল্যাণ মন্ত্ৰালয়ে বিভিন্ন ধৰণৰ পদক্ষেপ হাতত লৈছে বুলিও ৰিজিজুই মন্তব্য কৰে।
