বিশ্বৰ ভিতৰতে আটাইতকৈ দুৰ্ধৰ্ষ সন্ত্ৰাসবাদী হিচাপে স্বীকৃত তথা সন্ত্ৰাসবাদী সংগঠন আল কাইদাৰ প্ৰতিষ্ঠাতা ওছামা বিন লাডেনৰ ছবি কাৰ্যালয়ত ওলোমাই ৰাখি চাকৰি হেৰুৱাবলগীয়া হৈছে এগৰাকী চৰকাৰী বিষয়াই। এই ঘটনা সংঘটিত হৈছে উত্তৰ প্ৰদেশত।
উত্তৰ প্ৰদেশ পাৱাৰ কৰ্প’ৰেশ্যন লিমিটেডৰ এগৰাকী মহকুমা বিষয়াক নিজৰ কাৰ্যালয়ত বিশ্বত্ৰাস সন্ত্ৰাসবাদী গৰাকীৰ ছবি ৰখাৰ অভিযোগত চাকৰিৰ পৰা বৰ্খাস্ত কৰা হৈছে।
প্ৰকাশিত খবৰ অনুসৰি ৰবীন্দ্ৰ প্ৰকাশ গৌতম নামৰ বিষয়াগৰাকীয়ে লাডেনক নিজৰ আদৰ্শ হিচাপে গ্ৰহণ কৰিছিল আৰু সেয়ে নিজ কাৰ্যালয়ত লাডেনৰ এখন ছবি ৰাখিছিল।
বিগত ২০২২ বৰ্ষৰ জুন মাহত ফাৰুখাবাদ জিলাৰ কায়ামগঞ্জ মহকুমা-২ ত নিযুক্ত হোৱাৰ সময়ত বিষয়াগৰাকীয়ে লাডেনৰ ছবিখন কাৰ্যালয়ত ৰাখিছিল।
তেওঁৰ কাৰ্যালয়ৰ এক ভিডিঅ’ ক্লিপ ভাইৰেল হোৱাৰ পিছত দক্ষিণাঞ্চল বিদ্যুৎ বিত্ৰাণ নিগমে গৌতমক চাকৰিৰ পৰা নিলম্বন কৰি তদন্ত আৰম্ভ কৰে।
তদন্তৰ অন্তত উত্তৰ প্ৰদেশ পাৱাৰ কৰ্প’ৰেশ্যন লিমিটেডৰ অধ্যক্ষ এম দেৱৰাজে ৰবীন্দ্ৰ প্ৰকাশ গৌতমক চাকৰিৰ পৰা বৰ্খাস্ত কৰাৰ নিৰ্দেশ দিয়ে আৰু সোমবাৰে তেওঁক চাকৰিৰ পৰা বৰ্খাস্ত কৰা হয়।
জানিব পৰা মতে, ওছামা বিন লাডেন এগৰাকী অভিযন্তা ডিগ্ৰীধাৰী হোৱাৰ বাবেই ৰবীন্দ্ৰ প্ৰকাশ গৌতম তেওঁৰ প্ৰতি আকৰ্ষিত হয় আৰু লাডেনক আদৰ্শ হিচাপে গ্ৰহণ কৰিছিল।
