জন্মসূত্ৰে নাগৰিকত্বৰ অধিকাৰৰ অন্ত পেলোৱাৰ সিদ্ধান্ত স্থগিত ৰাখিছে আমেৰিকাৰ প্ৰাদেশিক আদালতে। ছিয়াটলৰ আদালতৰ ন্যায়াধীশে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ এই সিদ্ধান্তক সম্পূৰ্ণ অসাংবিধানিক বুলি অভিহিত কৰিছে। জন্মসূত্ৰে আমেৰিকাৰ নাগৰিকত্ব নিদিয়াৰ নিৰ্দেশনাও সাময়িকভাৱে স্থগিত ৰাখিছে।
উল্লেখ্য যে ৰাষ্ট্ৰপতি হিচাপে শপত গ্ৰহণ কৰাৰ কিছু সময়ৰ পিছতে ট্ৰাম্পে নিৰ্দেশ দিছিল যে অনুপ্ৰৱেশকাৰীৰ সন্তানক আৰু জন্মসূত্ৰে আমেৰিকাৰ নাগৰিকত্ব প্ৰদান কৰা নহ’ব।
ৰিপাব্লিকান নেতাৰ এই নিৰ্দেশ প্ৰকাশ পোৱাৰ পিছত আমেৰিকাৰ ২২খন প্ৰদেশে এনে নিৰ্দেশৰ বিৰুদ্ধে থিয় দিছে। কলম্বিয়া আৰু ছান ফ্ৰান্সিস্কোৰ দৰে প্ৰদেশসমূহে এই নিৰ্দেশৰ তীব্ৰ বিৰোধিতা কৰি গোচৰ তৰিছে।
ট্ৰাম্পৰ এই নিৰ্দেশৰ বিৰুদ্ধে বষ্টন, ছিয়াটল, মেছাচুচেটছ আৰু নিউ হামচায়াৰৰ আদালতত গোচৰ ৰুজু হৈছে। বৃহস্পতিবাৰে ছিয়াটলৰ ন্যায়াধীশ জন ক’নাৰৰ আদালত কক্ষত শুনানি গ্ৰহণ কৰা হয় এই গোচৰৰ।
শুনানিৰ শেষত ন্যায়াধীশগৰাকীয়ে ট্ৰাম্পৰ এই নিৰ্দেশে সংবিধানৰ আদৰ্শ উলংঘা কৰা বুলি উল্লেখ কৰে। মন কৰিবলগীয়া যে আমেৰিকাৰ সংবিধানৰ চতুৰ্দশ সংশোধনীত উল্লেখ কৰা হৈছিল যে আমেৰিকাৰ মাটিত জন্ম হ’লেই নাগৰিকত্ব প্ৰদান কৰা হ’ব। কিন্তু ট্ৰাম্পে এই সংশোধনীৰ প্ৰত্যক্ষ বিৰোধিতা কৰিছে বুলি ছিয়াটলৰ আদালতৰ ন্যায়াধীশে কয়। কিন্তু ইয়াৰ প্ৰতি যুক্তিত আমেৰিকাৰ ন্যায় বিভাগে ট্ৰাম্পৰ এই নিৰ্দেশে কোনো ক্ষতি কৰা নাই বুলি উল্লেখ কৰে। নিৰ্দিষ্ট সময়ৰ পিছত কাৰ্যকৰী হ’ব ৰাষ্ট্ৰপতিৰ এই আদেশ। কিন্তু এতিয়াৰ বাবে ট্ৰাম্পৰ এই সিদ্ধান্ত প্ৰাদেশিক আদালতত বাধাৰ সন্মুখীন হৈছে।
নিৰ্বাচনী প্ৰচাৰৰ পৰাই ৰিপাব্লিকান প্ৰাৰ্থী ট্ৰাম্পৰ লক্ষ্য হৈ পৰিছে অনুপ্ৰৱেশকাৰী। বৰ্তমান আমেৰিকাৰ মাটিত ১ কোটি ৪০ লাখ অনুপ্ৰৱেশকাৰী আছে। ইয়াৰে ৭ লাখ ২৫ হাজাৰ ভাৰতীয়। কিন্তু ট্ৰাম্পে স্পষ্ট কৰি দিছে যে নথি-পত্ৰবিহীন অনুপ্ৰৱেশকাৰীক আমেৰিকাৰ পৰা বিতাড়িত কৰা হ’ব।
কেৱল সেয়াই নহয়, আমেৰিকাৰ মাটিত জন্মগ্ৰহণ কৰা শ্ৰমিক অনুপ্ৰৱেশকাৰীৰ সন্তান পুৰণি আইন অনুসৰি আৰু আমেৰিকাৰ নাগৰিকত্বৰ বাবে যোগ্য নহ’ব। তদুপৰি পিতৃ-মাতৃৰ ভিতৰত অন্ততঃ এজনৰ গ্ৰীণ কাৰ্ড নাথাকিলে শিশুটিয়ে জন্মসূত্ৰে নাগৰিক হোৱাৰ সুযোগ নাপাব।
