আজিৰ দিনটো কেৱল উত্তৰ প্ৰদেশৰ বাবেই নহয়, সমগ্ৰ দেশৰ বাবেই এক উল্লেখযোগ্য দিন।
কাৰণ সুদীৰ্ঘ ৫০০ বছৰৰ অপেক্ষাৰ অন্তত অযোধ্যাত প্ৰধানমন্ত্ৰী নৰেন্দ্ৰ মোডীয়ে কৰিলে ৰাম মন্দিৰৰ শিলান্যাস।
কিন্তু এনে এটা আনন্দৰ দিনতে উত্তৰ প্ৰদেশত আহিল আন এটা বেয়া খবৰ।
উত্তৰ প্ৰদেশৰ আইনমন্ত্ৰী ব্ৰীজেশ পাঠক মাৰাত্মক ক’ৰ’ণা ভাইৰাছত আক্ৰান্ত হোৱাৰ খবৰে ভূমি পূজনৰ আনন্দত সামান্য পৰিমানে হ’লেও য’তি পেলায়।
কাৰণ অযোধ্যাৰ ভূমি পূজনৰ সৈতে লাগি-ভাগি থকা লোক জনেই হৈছে ৰাজ্য খনৰ আইন মন্ত্ৰী ব্ৰীজেশ পাঠক।
কিছুদিনৰ পৰা জ্বৰত আক্ৰান্ত হৈ থকা পাঠকে ঘৰতে জিৰণি লৈ আছিল।
ক’ৰ’ণা ভাইৰাছৰ পৰীক্ষা কৰাৰ অন্ত আজি তেওঁৰ ফলাফল পজিটিভ আহে।
ইয়াৰ পিছতে মন্ত্ৰী পাঠকে ফেচবুকৰ জৰিয়তে ক’ৰ’ণাত আক্ৰান্ত হোৱাৰ কথা ৰাজহুৱা কৰে।
পাঠককে ধৰি যোগী আদিত্য নাথ চৰকাৰৰ ৯ জনকৈ মন্ত্ৰী-বিধায়ক ক’ৰ’ণাত আক্ৰান্ত হ’ল।
ইতিমধ্যে ক’ৰ’ণাত আক্ৰান্ত হৈ যোগী মন্ত্ৰী সভাৰ কাৰিকৰী দপ্তৰৰ মন্ত্ৰী কমলা ৰাণী বৰুণৰ মৃত্যু ঘটিছে।
কিছুদিন পূৰ্বে উত্তৰ প্ৰদেশৰ জলশক্তি দপ্তৰৰ মন্ত্ৰী ডাঃ মহেন্দ্ৰ সিং আৰু গোৰখপুৰৰ বিধায়ক দেবেন্দ্ৰ প্ৰতাপ সিহৰ লগতে আগ্ৰাৰ বিধায়ক যোগেন্দ্ৰ উপাধ্যায় ক’ৰ’ণাত আক্ৰান্ত হৈছে।
