অতিমাৰী ক’ৰণা ভাইৰাছৰ ভেকচিনৰ প্ৰতি সজাগতাৰ লক্ষ্যলৈ বঙাইগাঁৱৰ ৰিয়ন ফিল্মচৰ বেনাৰত নিৰ্মিত ‘ভেকচিন নিতে যাই’ নামৰ চুটি ছবিখনৰ গীতৰ ভিডিঅ বৃহত্তৰ বঙাইগাঁৱ প্ৰেছ ক্লাবত আয়োজিত এক অনুষ্ঠানত মুকলি কৰা হয় ৷
চুটি ছবিখনৰ ’ভেকচিন নিতে যাই ’ শীৰ্ষক গীতটিৰ ভিডিঅটো মুকলি কৰে বঙাইগাঁও জিলাৰ উপায়ুক্ত ডা° এম এছ লক্ষীপ্ৰিয়াই ৷
গীতৰ ভিডিঅ মুকলি কৰি জিলা উপায়ুক্তগৰাকীয়ে ভেকচিন সজাগতাৰ বাবে ভিডিঅটো ব্যৱহাৰ কৰাৰ বাবে চিন্তা চৰ্চা কৰা বুলি নিজৰ বক্তব্যত কয় ৷
উল্লেখ্য যে চুটি ছবিখনৰ কাহিনী , চিত্ৰনাট্য , সংলাপ আৰু পৰিচালনা তথা সম্পাদনা কৰিছে গকুল নাথে ৷
ছবিখনৰ গীতটিৰ কথা আৰু সুৰ নৰ্মদা দাসৰ আৰু সংগীতেৰে সজাইছে মৃণাল সিংহই ৷ গীতটিক কন্ঠদান কৰিছে অসমৰ জনপ্ৰিয় কন্ঠশিল্পী নিৰ্মালি দাস আৰু অসীম পাটগিৰীয়ে ৷ কৰিঅগ্ৰাফীৰ কাম কৰিছে পল ৰাজ কোঁৱৰে আৰু কেমেৰাত আছিল প্ৰিয়ম ৰায় ৷
সেইদৰে ৰূপসজ্জাত নিলাক্ষী সিংহ আৰু ব্যৱস্থাপনাৰ দায়িত্বত আছিল কল্যাণ সিংহ ৷ ছবিখনৰ আৱহ সংগীত গৌৰাংগ ( বাবলু ) ৰ ৷ ছবিখনৰ বিভিন্ন চৰিত্ৰত নৰ্মদা দাস , গকুল নাথ , হৰ্ষিতা ৰায় , বিশ্বজিৎ ৰায় , ঘনশ্যাম ৰাভা , দীপক ৰায় , সুস্মিতা দত্ত , ক্ষীৰোদ দাস নিৰু বৰ্মন ৰায় আৰু ভূয়সী পাঠকে অভিনয় কৰিছে ৷
ভূয়সী পাঠকে প্ৰযোজনা কৰা চুটি ছবিখনৰ গীতৰ ভিডিঅ মুকলি অনুষ্ঠানত বঙাইগাঁও মহাবিদ্যালয়ৰ অধ্যক্ষা ৰূপাঞ্জলি দেৱী আৰু কন্ঠশিল্পী ৰীণা কলিতা সহ আৰু কেইবাজনো বিশিষ্ট ব্যক্তি উপস্থিত থাকে ৷ এই অনুষ্ঠানটোৰ আতঁ ধৰে শিল্পী দীপক দাসে ৷
