উত্তৰ-পূবৰ নেতাসকলক বুজাই দিয়া হৈছে, বুধবাৰে উত্থাপিত হ’ব নাগৰিকত্ব বিধেয়ক: ৰিজিজু
নাগৰিকত্ব বিধেয়ক সন্দৰ্ভত উত্তৰ-পূবৰ সকলো মুখ্য মন্ত্ৰীকে ধৰি ৰাজনৈতিক নেতাসকলৰ অস্পষ্টতা দূৰ কৰা হৈছে আৰু বুধবাৰে ৰাজ্যসভাত উত্থাপিত হ’ব বিলখন।
মঙলবাৰে বিধেয়কখন উত্থাপন নোহোৱাৰ পিছতে নতুন দিল্লীত এই ঘোষণা কৰিছে কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে।
“বিধেয়কখনৰ বিভিন্ন দিশসমূহ সন্দৰ্ভত তেওঁলোকক স্পষ্টীকৰণ দিয়া হৈছে,” মেঘালয়, নাগালেণ্ড আৰু মিজোৰামৰ মুখ্য মন্ত্ৰীৰ লগতে খোদ বিজেপি শাসিত মণিপুৰ, অৰুণাচল প্ৰদেশৰ মুখ্য মন্ত্ৰীয়েও বিধেয়কখন উত্থাপনৰ বিৰোধিতা কৰাৰ মাজতে মঙলবাৰে এই ঘোষণা ৰিজিজুৰ।
বিধেয়কখনক লৈ “অযথা আশংকা” কৰা হৈছে বুলি মন্তব্য কৰি অৰুণাচল প্ৰদেশৰ সাংসদজনে কয় যে উত্তৰ-পূবৰ সাংস্কৃতিক, সামাজিক আৰু ভাষিক পৰিচয় আৰু ঐতিহ্য ৰক্ষাৰ বাবে কেন্দ্ৰই উচ্চ স্তৰীয় সমিতি গঠন কৰিব আৰু সেই কথাও ৰাজনৈতিক নেতাসকলক জনাই দিয়া হৈছে।
উত্তৰ-পূবৰ খিলঞ্জীয়াৰ সৰ্বাত্মক বিৰোধিতাৰ সন্মুখীন হোৱা বিধেয়কখনৰ বিৰুদ্ধে “কিছু প্ৰতিবাদ”ৰহে খবৰ আছে বুলিও মন্তব্য কৰিছে ৰিজিজুৱে।