জিলা প্ৰশাসনৰ নিৰ্দেশকক অমান্য কৰি শিৱসাগৰত চোৰাংকৈ বিক্ৰী খাৰুপেটীয়াৰ পাচলি

চৰকাৰৰ ল’কডাউনৰ নিৰ্দেশনা উলংঘা কৰি শিৱসাগৰত একাংশ সন্দেহজনক ব্যক্তিয়ে চোৰাং ভাৱে পাচলি বিক্ৰী কৰি আহিছিল।

শিৱসাগৰৰ আৰক্ষী অধীক্ষকৰ কাৰ্যালয়ৰ সমীপতে এচাম দুষ্ট চক্ৰই এইদৰে খাৰুপেটীয়াৰ পৰা চোৰাংকৈ গাড়ীয়ে গাড়ীয়ে বিভিন্ন পাচলি আনি বিক্ৰী কৰি থকাৰ তথ্য লাভ কৰি আজি শিৱসাগৰৰ খাদ্য আৰু অসামৰিক যোগান বিভাগৰ পৰিদৰ্শক দেৱজিৎ বুজৰবৰুৱা আৰু ৰিপুন বৰগোঁহাইৰ নেতৃত্বত এটা দলে অভিযান চলাই লক্ষাধিক টকাৰ মূল্যৰ পাচলি জব্দ কৰে।

খাদ্য আৰু অসামৰিক যোগান বিভাগৰ বিষয়া অহাৰ খবৰ পোৱাৰ লগে লগেই পাচলি বিক্ৰী কৰি থকা সন্দেহজনক ব্যক্তিকেইজন পলাবলৈ সক্ষম হয় যদিও পাচলি ভৰ্তি গাড়ী এখন আৰক্ষীয়ে জব্দ কৰে।

উল্লেখ যোগ্য যে, শিৱসাগৰ জিলা প্ৰশাসনে জিলাখনত খাৰুপেটীয়াৰ পৰা পাচলি আমদানি কৰা আৰু বিক্ৰী কৰাটো নিষিদ্ধ কৰি এক নিৰ্দেশ জাৰি কৰিছিল যদিও প্ৰশাসনৰ নিৰ্দেশক অমান্য কৰি কেনেকৈ পাচলি বিক্ৰী কৰি আছিল সেয়া এক ৰহস্যৰ বিষয় হৈ পৰিছে।