হিমাৰ আদৰ্শৰে অনুপ্ৰাণিত হৈ অসমীয়া সাহিত্যিকসকলে কলম ধৰক : ধীৰেন্দ্ৰ নাথ চক্ৰৱৰ্তী
অসমীয়া সাহিত্যিকসকলক হিমাৰ আদৰ্শৰে অনুপ্ৰাণিত হৈ সাহিত্যচৰ্চা চলাই যাবলৈ আহ্বান জ্যেষ্ঠ সাংবাদিক ধীৰেন্দ্ৰ নাথ চক্ৰৱৰ্তীৰ। বুধবাৰে গুৱাহাটী প্ৰেছ ক্লাৱত অসম সাংবাদিক-সাহিত্যিক পেন্সনাৰ সন্থাৰ উদ্যোগত অনুষ্ঠিত ৰাজ্য চৰকাৰৰ পৰা নতুনকৈ পেন্সন লাভ কৰা সাংবাদিক-সাহিত্যিকসকলক অভিনন্দন জ্ঞাপন অনুষ্ঠানৰ পিছতেই সংবাদমাধ্যমৰ আগত তেওঁ এই মন্তব্য কৰে।
অসম সাংবাদিক-সাহিত্যিক পেন্সনাৰ সন্থাৰ সভাপতি চক্ৰৱৰ্তীয়ে পেন্সন লাভ কৰা সকলক উদ্দেশ্যি কয়, ‘হিমাৰ দৰে অখ্যাত ছোৱালীয়ে যদি বিশ্ব জয় কৰিব পাৰে, অসমীয়া সাহিত্যিকসকলেও হিমাৰ আদৰ্শৰে অনুপ্ৰাণিত হৈ কলম ধৰক।’
উল্লেখযোগ্য যে, পেঞ্চন লাভ কৰা বহু সাহিত্যিক পেন্সনাৰ ইতিমধ্যে পৃথিবীৰ পৰা বিদায় মাগিলে, এতিয়া ৰাজ্যত প্ৰায় ৭০০ গৰাকী সাহিত্যিক পেন্সনাৰ আছে বুলি তেওঁ জানিবলৈ দিয়ে।
অসমীয়া সাহিত্য সম্পৰ্কত মন্তব্য কৰি তেওঁ কয়, ‘অসমীয়া সাহিত্যত ভাল কবিতা সৃষ্টি হৈছে, ভাল গল্প সৃষ্টি হৈছে, কিন্তু বৈপ্লৱিক পৰিৱৰ্তনৰ কাৰণে প্ৰচণ্ড জোৱাৰ সৃষ্টি কৰিব পৰা সাহিত্যৰ সৃষ্টি হোৱা নাই।’
তেওঁ লগতে কয়, ‘সাহিত্য জগতৰ বৈপ্লৱিক পৰিৱৰ্তনে সমাজৰ সকলো দুৰ্নীতি, অন্ধতা আৰু সংকীৰ্ণতাৰ উৰ্দ্ধত এখন উদাৰ আৰু সংস্কাৰমুখী সমাজ গঢ়ি তুলিব।’ তদুপৰি অসমীয়া সাহিত্যৰ প্ৰতি পেন্সনাৰ সাহিত্যিকসকলে সেৱা আগবঢ়োৱাৰ লগতে নতুন সাহিত্যিক সকলকো উদ্বুদ্ধ কৰিব লাগিব বুলি তেওঁ কয়।
তদুপৰি সংবাদমাধ্যমৰ আগত জ্যেষ্ঠ সাংবাদিকগৰাকীয়ে ইংৰাজ চৰকাৰৰ দিনতেই অৰ্থ্যাৎ
১৯১২ চনতে সাহিত্যিক পেন্সন প্ৰৱৰ্তন কৰা হৈছিল বুলি জানিবলৈ দি তেওঁ কয়, ‘প্ৰথম গৰাকী পেন্সনাৰ সাহিত্যিক আছিল পদ্মনাথ গোহাঞি বৰুৱা। সেইসময়ত পেন্সন পাবৰ বাবে আবেদন জনোৱাত দুবছৰৰ চেষ্টাৰ অন্তত ইংলেণ্ড চৰকাৰে হুকুম দিয়াৰ পাছতহে পদ্মনাথ গোহাঞি বৰুৱাই সাহিত্যিক পেন্সন লাভ কৰিছিল।’