পদত্যাগ কৰিছে ভাৰতৰ উপ-ৰাষ্ট্ৰপতি তথা ৰাজ্যসভাৰ অধ্যক্ষ জগদীপ ধনখৰে। স্বাস্থ্যৰ অসুস্থতাৰ কাৰণ দেখুৱাই সোমবাৰে নিজৰ পদৰ পৰা পদত্যাগ কৰিছে উপৰাষ্ট্ৰপতি গৰাকীয়ে।
উল্লেখ্য যে ২০২২ চনৰ ১১ আগষ্টত ভাৰতৰ ১৪তম উপ-ৰাষ্ট্ৰপতি হিচাপে শপত গ্ৰহণ কৰিছিল ধনখৰে।
সোমবাৰে ৰাষ্ট্ৰপতি দ্ৰৌপদী মুৰ্মুলৈ পদত্যাগ পত্ৰ প্ৰেৰণ কৰিছে উপৰাষ্ট্ৰপতি গৰাকীয়ে। এই খবৰে এতিয়া ৰাজনৈতিক মহলত এক মিশ্ৰিত প্ৰতিক্ৰিয়াৰ সৃষ্টি কৰিছে।
চলিত বছৰৰ মাৰ্চ মাহত ধনখৰক অল ইণ্ডিয়া ইনষ্টিটিউট অৱ মেডিকেল ছায়েন্সছ (AIIMS)ত বুকুৰ বিষৰ বাবে ভৰ্তি কৰোৱা হৈছিল। চিকিৎসকসকলে তেওঁক সম্পূৰ্ণ বিশ্ৰামৰ পৰামৰ্শ দিছিল। সেয়েহে স্বাস্থ্যৰ প্ৰতি লক্ষ্য ৰাখি ধনখৰে এই গুৰুত্বপূৰ্ণ সিদ্ধান্ত গ্ৰহণ কৰিছে।
নিয়ম অনুসৰি নতুন উপ-ৰাষ্ট্ৰপতি নিৰ্বাচিত নোহোৱালৈকে ৰাজ্যসভাৰ উপাধ্যক্ষই অধ্যক্ষৰ দায়িত্ব পালন কৰিব।
উল্লেখ কৰিব লাগিব যে ধনখৰৰ কাৰ্যকালত তেওঁ ৰাজ্যসভাৰ কাৰ্য্যপৰিচালনাৰ ক্ষেত্ৰত কেইবাটাও বিতৰ্কৰ সন্মুখীন হৈছিল। বিৰোধী দলসমূহে তেওঁৰ ওপৰত পক্ষপাতমূলক আচৰণৰ অভিযোগ তুলিছিল আৰু ২০২৪ৰ ডিচেম্বৰত তেওঁৰ বিৰুদ্ধে এটা অনাস্থাৰ প্ৰস্তাৱো দাখিল কৰা হৈছিল। তথাপিও ধনখৰে সদায় নিজৰ সিদ্ধান্তৰ ন্যায্যতাৰ কথা উল্লেখ কৰিছিল। তেওঁৰ পদত্যাগৰ পিছত ৰাজনৈতিক মহলত এতিয়া নতুন উপ-ৰাষ্ট্ৰপতিৰ নিৰ্বাচনৰ বিষয়ে আলোচনা আৰম্ভ হৈছে।
