ভাৰতৰ নিৰ্বাচনী আয়োগে দেওবাৰে ঘোষণা কৰা মুঠ ৭টা পৰ্যায়ৰ নিৰ্বাচনৰ ভোটগ্ৰহণ ত্ৰিপুৰাত দুটা পৰ্যায়ত অনুষ্ঠিত হ’ব। দেওবাৰে সন্ধিয়া ত্ৰিপুৰাৰ মুখ্য নিৰ্বাচনী বিষয়া শ্ৰীৰাম তৰণিকান্তই এক সংবাদমেল যোগে এই কথা জনায়।
পশ্চিম ত্ৰিপুৰা সমষ্টিটোৰ বাবে অহা ১১ এপ্ৰিলত প্ৰথম পৰ্যায়ত আৰু জনজাতিৰ বাবে সংৰক্ষিত পূব ত্ৰিপুৰা সমষ্টিটোৰ বাবে অহা ১৮ এপ্ৰিলত দ্বিতীয় পৰ্যায়ত ভোটগ্ৰহণ হ’ব।
মুখ্য নিৰ্বাচনী বিষয়াগৰাকীয়ে লগতে জানিবলৈ দি কয় যে প্ৰথম পৰ্যায়ৰ বাবে অহা ১৮ মাৰ্চত জাৰি হ’ব অধিসূচনা আৰু মনোনয়ন দাখিলৰ অন্তিম তাৰিখ হ’ব ২৫ মাৰ্চ। ২৬ মাৰ্চত প্ৰাৰ্থীসকলৰ মনোনয়ন পৰীক্ষা কৰা হ’ব আৰু মনোনয়ন প্ৰত্যাহাৰৰ অন্তিম তাৰিখ ২৮ মাৰ্চ বুলি জানিবলৈ দিয়ে।
আনহাতে দ্বিতীয় পৰ্যায়ৰ বাবে অহা ১৯ মাৰ্চত জাৰি হ’ব অধিসূচনা আৰু মনোনয়ন দাখিলৰ অন্তিম তাৰিখ হ’ব ২৬ মাৰ্চ। ঠিক সেইদৰে ২৭ মাৰ্চত পৰীক্ষা কৰা হ’ব প্ৰাৰ্থীসকলৰ মনোনয়ন আৰু মনোনয়ন প্ৰত্যাহাৰৰ অন্তিম তাৰিখ ২৯ মাৰ্চ হ’ব বুলি মুখ্য নিৰ্বাচনী বিষয়া শ্ৰীৰাম তৰণিকান্তই জনায়।
ইফালে অহা ২৩ মে’ত সমগ্ৰ দেশৰ লগতে ত্ৰিপুৰাৰ দুয়োটা সমষ্টিৰে নিৰ্বাচনৰ ভোটগণনা তথা ফলাফল ঘোষণা কৰা হ’ব।
নিৰ্বাচন আয়োগে নিৰ্বাচনৰ দিন ঘোষণা কৰাৰ পাছতেই সমগ্ৰ দেশৰ লগতে ত্ৰিপুৰাতো নিৰ্বাচনী আচৰণ বিধি বলবৎ হোৱা বুলি ৰাজ্যখনৰ মুখ্য নিৰ্বাচনী বিষয়াগৰাকীয়ে উল্লেখ কৰে।
