জম্মু-কাশ্মীৰত এতিয়া দেশৰ সকলোৰে দৃষ্টি নিৱদ্ধ হৈছে। যুদ্ধ সদৃশ পৰিৱশে বিৰাজ কৰিছে উপত্যকাটোত।
অতিৰিক্তি সুৰক্ষা বাহিনী নিয়োগ কৰাৰ লগতে ৰাজনৈতিক উদ্বিগ্নতাও বৃদ্ধি পাইছে।
কেন্দ্ৰীয় চৰকাৰে কাশ্মীৰৰ ক্ষেত্ৰত কোনো ডাঙৰ সিদ্ধান্ত লোৱাৰ সম্ভাৱনা ব্যক্ত কৰিছে সূত্ৰসমূহে।
কাশ্মীৰত সঘনে হোৱা পট পৰিৱৰ্তনৰ মাজতে ৰাজ্যখনৰ প্ৰাক্তন মুখ্য মন্ত্ৰী তথা পিডিপি নেতা মেহবুবা মুফটিক গৃহবন্দী কৰি ৰখা হৈছে।
নেশ্যনেল কনফাৰেন্সৰ নেতা প্ৰাক্তন মুখ্য মন্ত্ৰী ওমৰ আব্দুল্লাকো শ্ৰীনগৰত গৃহবন্দী কৰি ৰখা হৈছে।
সেইদৰে পীপলছ কনফাৰেন্সৰ মুৰব্বী ছাজাদ লোনকো গৃহবন্দী কৰি ৰখাৰ বাতৰি পোৱা গৈছে।
প্ৰাক্তন মুখ্য মন্ত্ৰীদ্বয় মুফটি আৰু আব্দুল্লাই ৰাজ্যখনৰ জনসাধাৰণক শান্তি শৃংখলা অটুট ৰখাৰ বাবে আহ্বান জনাইছে।
দেওবাৰে নিশাৰে পৰা নেতাসকলক গৃহবন্দী কৰি ৰখা বুলি সূত্ৰসমূহে সদৰী কৰিছে।
কেন্দ্ৰই ৰাজ্যখনত কি নীতি প্ৰয়োগ কৰিব বিচাৰিছে তাক লৈ নেতাসকল দোমোজাত আছে।
ইপিনে, ৰাজ্যখনত সুৰক্ষা বাহিনী যিকোনো সম্ভাৱ্য আইন-শৃংখলাজনিত পৰিস্থিতিৰ মোকাবিলা কৰিবলৈ সষ্টম হৈ পৰিছে।
জানিব পৰা মতে, নতুন দিল্লীত কেবিনেট বৈঠক অনুষ্ঠিত হৈছে আৰু জম্মু-কাশ্মীৰ সন্দৰ্ভত বিশেষ সিদ্ধান্ত গ্ৰহণৰ অনুমান কৰা হৈছে।
বৰ্তমান জম্মু-কাশ্মীৰত উদ্ভৱ হোৱা পৰিস্থিতিৰ প্ৰতি লক্ষ্য ৰাখি ৰাজ্যসমূহক সতৰ্ক কৰি দিয়া হৈছে।
