গুৱাহাটী মহানগৰীৰ ৫৫ হাজাৰ পৰিয়াললৈ বিশুদ্ধ খোৱা পানী; ১৫ মাৰ্চত প্ৰথম পৰ্যায়ৰ পানীযোগান আঁচনিৰ শুভাৰম্ভ কৰিব মুখ্য মন্ত্ৰীয়ে
চলিত বছৰৰ ডিচেম্বৰ মাহৰ ভিতৰত গুৱাহাটী মহানগৰীৰ ৫৫ হাজাৰ পৰিয়ালে বিশুদ্ধ খোৱাপানী লাভ কৰিব।
প্ৰথম পৰ্যায়ত এই আঁচনিখন অহা ১৫ মাৰ্চত মুখ্য মন্ত্ৰীয়ে শুভাৰম্ভ কৰিব।
আজি মুখ্য মন্ত্ৰী সোণোৱালৰ পৌৰোহিত্যত জনতা ভৱনস্থিত মুখ্য মন্ত্ৰীৰ কাৰ্য্যালয়ৰ সভাকক্ষত অনুষ্ঠিত গুৱাহাটী উন্নয়ন বিভাগৰ কাম-কাজৰ পৰ্যালোচনা বৈঠকত এই সিদ্ধান্ত গ্ৰহণ কৰা হয়।
আজিৰ এই বৈঠকত গুৱাহাটী মহানগৰীৰ পানী যোগান প্ৰকল্প সমূহৰ ৰূপায়নৰ কাম-কাজৰ বিতংভাৱে পৰ্যালোচনা কৰা হয়।
বৈঠকত গুৱাহাটী মহানগৰীৰ বিভিন্ন ঠাইত চলি থকা প্ৰকল্প সমূহৰ কাম-কাজৰ অগ্ৰগতিৰ বিষয়ে গুৱাহাটী উন্নয়ন বিভাগৰ শীৰ্ষ বিষয়াসকলে মুখ্য মন্ত্ৰীক অৱগত কৰে।
মুখ্য মন্ত্ৰীয়ে পানী যোগান প্ৰকল্পৰ জৰিয়তে মহানগৰীৰ জনসাধাৰণক যাতে সম্পূৰ্ণভাৱে সামৰি ল’ব পৰা যাই তাৰ বাবে যথোচিত পদক্ষেপ গ্ৰহণ কৰিবলৈও সংশ্লিষ্ট বিভাগক নিৰ্দেশ দিয়ে।
আজিৰ এই বৈঠকতে গুৱাহাটী মহানগৰীৰ গৃহ নিৰ্মাণৰ বিভিন্ন দিশ সমূহো পৰ্যালোচনা কৰা হয়।
বৈঠকত গুৱাহাটী উন্নয়ন বিভাগৰ বিষয়াসকলে মুখ্য মন্ত্ৰীক অৱগত কৰে যে মুখ্য মন্ত্ৰীৰ ‘সহজ গৃহ নিৰ্মাণ আঁচনি’ৰ অধীনত এতিয়াৰ পৰা নূন্যতম চাৰি লেচা ভূমিৰ গৰাকীয়েও গৃহ নিৰ্মাণৰ অনুমতি লাভ কৰিব।
তদুপৰি, চাৰি লেচাৰ পৰা দহ লেচা পৰ্যন্ত ভূমিৰ গৰাকীয়ে তাৎক্ষণিকভাৱে অট্টালিকা নিৰ্মাণৰ অনুমতি লাভ কৰিব।
বৈঠকত সোণোৱালে গৃহ নিৰ্মাণৰ ক্ষেত্ৰত প্ৰযোজ্য হৈ থকা নীতি সমূহ কঠোৰভাৱে ৰূপায়ন কৰিবলৈ সংশ্লিষ্ট বিভাগক নিৰ্দেশ দিয়ে।