সাৱধান! পৰিধান কৰক আইএছআই মাৰ্কযুক্ত হেলমেট: নহ’লে সাজু হওক জৰিমনাৰ বাবে
আপুনি বাইক চলাওঁতে হেলমেট পৰিধান কৰেনে? ট্ৰেফিক পুলিচৰ ৰঙাচকুলৈ ভয় কৰি নিশ্চয় আপুনি হেলমেট পৰিধান কৰে! কিন্তু আপোনাৰ হেলমেটত আইএছআই মাৰ্ক আছেনে?
অথবা হেলমেটৰ ফিটাকেইডাল ভালদৰে মাৰি লয়নে? যদি নলয়, তেন্তে জৰিমনা ভৰিবলৈ সাজু হওক!
শেহতীয়াকৈ মটৰ ভেহিকলছ এক্ট ১৯৯৮ আপডেট কৰা হৈছে। এক্টখনৰ ১২৯ ধাৰা অনুসৰি বাইক আৰোহীয়ে পৰিধান কৰা হেলমেটটোত আইএছআই মাৰ্ক আৰু ব্যুৰো অৱ ইণ্ডিয়ান ষ্টেণ্ডাৰ্ডছ চমুকৈ বিআইএছ চাৰ্টিফিকেচন থাকিবই লাগিব।
তদুপৰি হেলমেটটো কেৱল পিন্ধিলেই নহ’ব, ইয়াৰ ফিটাকেইডালো মাৰি ল’ব লাগিব। অন্যথা এহেজাৰ টকাকৈ জৰিমনা ভৰা হ’ব অথবা তিনি মাহৰ বাবে বাইক আৰোহীৰ লাইচেন্স কৰ্তন কৰা হ’ব।
আনহাতে, কেৱল হেলমেট পৰিধান কৰাই নহয়, ট্ৰেফিক লাইট অমান্য কৰিলেও দুহেজাৰ টকা পৰ্যন্ত জৰিমনা ভৰিব লাগিব।
উল্লেখযোগ্য যে ২০২১ চনৰ ১ জুনৰ পৰাই আইএছআই মাৰ্কবিহীন হেলমেটসমূহ নিষিদ্ধ কৰা হৈছে। কিন্তু আন্তঃৰাষ্ট্ৰীয় বজাৰত উপলব্ধ আইএছআই মাৰ্কবিহীন হেলমেটসমূহৰ ক্ষেত্ৰত ইয়াক কিদৰে প্ৰয়োগ কৰা হ’ব, সেইয়া স্পষ্ট হোৱা নাই।