ৰাজ্যৰ অন্যান্য দল সংগঠনৰ সমান্তৰালকৈ আজি কেন্দ্ৰীয় গৃহ মন্ত্ৰী অমিত শ্বাহক সাক্ষাৎ কৰে অগপ নেতৃত্বই। অগপ সভাপতি অতুল বৰাৰ নেতৃত্বত যোৱা দলটোত মন্ত্ৰী কেশৱ মহন্ত, ফণিভূষণ চৌধুৰী, বিধায়ক ৰমেন্দ্ৰ নাৰায়ণ কলিতা, সাধাৰণ সম্পাদক কমলা কলিতাই শ্বাহক সাক্ষাৎ কৰে।
”আমি পুনৰ দোহাৰিছো যিখন বিল কেন্দ্ৰীয় চৰকাৰে যোৱাবাৰ আনিছিল সেই বিলৰ আমি তীব্ৰ বিৰোধী আৰু বিৰোধিতা কৰো,” অতুল বৰাৰ মন্তব্য।
অমিত শ্বাহক সাক্ষাৎৰ সময়ত অগপ নেতৃত্বই কি আহ্বান জনালে সেই সম্পৰ্কত তলত আঞ্চলিকতাবাদী দলটোৰ সভাপতিৰ ভাষ্য অ-সম্পাদিতৰূপত আগবঢ়ালো-
- সৰ্বকালৰ বাবে অসমীয়া ভাষাটোৱে অসমত ৰাজ্যভাষা হিচাপে স্বীকৃতি পাই থাকক আৰু জনজাতীয় ভাষা সমানে সুৰক্ষিত হৈ থকাটো বিচাৰো বুলি গৃহ মন্ত্ৰী অমিত শ্বাহক কোৱা হৈছে।
- ভৱিষ্যতৰ বাবে বাংলাদেশৰ পৰা ধৰ্মীয় নিৰ্য্যাতনৰ বলি হৈ অহাসকলৰ বাবে পূৰ্বৰ কেবত সুৰুঙা আছিল। কিন্তু তেওঁ নতুন ৰূপত কেব অনাৰ কথা কৈছে।
- আমি যুঁজ কৰি আহিছো অসমীয়াৰ স্বাৰ্থত। ৬ বছৰীয়া আন্দোলনৰ অন্তত এখন চুক্তি অসমীয়াই পালে আৰু সেই চুক্তিখন ৰূপায়ণ কৰাৰ বাবে যোৱা সময়ছোৱাত কেন্দ্ৰীয় চৰকাৰে ব্যৱস্থা গ্ৰহণ নকৰিলে। অমিত শ্বাহে গৃহ মন্ত্ৰীৰ দায়িত্ব লোৱাৰ পাছত অসম চুক্তিৰ ৬ নং দফাৰ বাবে এখন উচ্চস্তৰীয় সমিতি গঠন কৰি দিয়াৰ বাবে তেওঁক ধন্যবাদ জনাইছো। সেই উচ্চস্তৰীয় কমিতিয়ে যি প্ৰতিবেদন দিয়ে সেয়া মানি লৈ আখৰে আখৰে পালন কৰিম বুলি গৃহ মন্ত্ৰীয়ে কৈছে। এইটো আমাৰ বাবে ভাল খবৰ।
- কেব নতুন ৰূপত কেনেকৈ আহিব সেইটো আমি নাজানো বা আমাক কোৱাও নাই, আমাক কৈছে যে খিলঞ্জীয়া মানুহৰ স্বাৰ্থত আঘাত হনা কাম নকৰো। তথাপি আমাৰ মনত শংকা আছে।
- সদৌ অসম ছাত্ৰ সন্থা, জাতীয়তাবাদী যুৱ ছাত্ৰ পৰিষদ, অসম সাহিত্য সভাক বিশেষভাৱে বিশ্বাসত লৈ কামবোৰ আগবঢ়াব লাগে বুলি অমিত শ্বাহক কোৱা হৈছে।
- অসমৰ খিলঞ্জীয়াৰ কাৰণে ভূমিৰ অধিকাৰ লাগিব আৰু বিধানসভাৰ ১২৬ খন আসনৰ ১০০ খনেই খিলঞ্জীয়াৰ কাৰণে সুৰক্ষিত কৰিব লাগিব বুলি কৈছো। লোকসভাৰ গোটেইকেইখন আসন খিলঞ্জীয়াক দিবৰ কৈছো।
- ৬ জনগোষ্ঠীক জনজাতিকৰণ কৰাৰ বাবে গৃহ মন্ত্ৰীক আহ্বান জনোৱাৰ লগতে তেওঁলোকে জনজাতিকৰণ পোৱাৰ যুক্তিযুক্ততা থকা বুলি ক’লো।
বিলখনৰ ড্ৰাফত কি আছে সেইখিনি চাইহে ৰাজ্যসভাৰ সাংসদ বীৰেন্দ্ৰ প্ৰসাদ বৈশ্যই তেওঁৰ মতামত সদনত ৰাখিব বুলি অতুল বৰাই উল্লেখ কৰে।
