দিল্লী ট্ৰেফিক পুলিচৰ আন এক চমক: এইবাৰ পথ সুৰক্ষাৰ বিজ্ঞাপনত ওলাল দীপ্তি শৰ্মাৰ মানকাড উইকেটৰ কৌশল

বিচিত্ৰ টুইটৰ জৰিয়তে যান-বাহন নিয়ম আৰু পথ সুৰক্ষা ব্যৱস্থাৰ বিষয়ে সজাগতা বিয়পোৱাৰ ক্ষেত্ৰত দিল্লী ট্ৰেফিক পুলিচে ইতিমধ্যে বিশেষ জনপ্ৰিয়তা অৰ্জন কৰিছে। সময়ে সময়ে কিছু অভিনৱ বিজ্ঞাপনেৰে জনসাধাৰণক আমোদ দি আহিছে দিল্লী ট্ৰেফিক পুলিচে।

শেহতীয়াকৈ এনে এক বিজ্ঞাপন পোষ্ট কৰি পুনৰ এবাৰ চৰ্চালৈ আহিছে দিল্লী ট্ৰেফিক পুলিচ। এইবাৰ বিভাগটোৱে পথ সুৰক্ষাৰ বিজ্ঞাপনত ব্যৱহাৰ কৰিছে শেহতীয়া এক ক্ৰিকেট মেচৰ বিশেষ দৃশ্য।

যোৱা শনিবাৰে ইংলেণ্ডৰ বিৰুদ্ধে এদিনীয়া শৃংখলাৰ তৃতীয় তথা অন্তিম এদিনীয়াত অৱতীৰ্ণ হৈছিল ভ্ৰমণকাৰী ভাৰতী মহিলা দল। মেচখনত ভাৰতে ইংলেণ্ডক পৰাস্ত কৰি ৩-০ ব্যৱধানত শৃংখলা হস্তগত কৰিছিল।

এই মেচখনতে ভাৰতীয় বলাৰ দীপ্তি শৰ্মাই ইংলেণ্ডৰ চাৰ্লি ডিনক নন-ষ্ট্ৰাইকাৰ এণ্ডত মানকাড নিয়মৰ আধাৰত ৰান আউট কৰি চৰ্চালৈ আহিছিল। এই কৌশলৰ বাবে ক্ৰিকেট বিশ্বত বিতৰ্কৰো সৃষ্টি হৈছিল।

দিল্লী ট্ৰেফিক পুলিচে এতিয়া পথ সুৰক্ষাৰ এই দহ ছেকেণ্ডৰ ভিডিঅ’টোত দীপ্তি শৰ্মাই অৱলম্বন কৰা এই কৌশলকে সন্নিৱিষ্ট কৰিছে। ভিডিঅ’টোৰ শিৰোনামত লিখা হৈছে, “গাড়ী চলোৱাৰ সময়ত সতৰ্কতা কিয় গুৰুত্বপূৰ্ণ…”।

ভিডিঅ’ ক্লিপটোৰ শেষত ট্ৰেফিক পুলিচে কেনেকৈ এক মুহূৰ্তৰ অসাৱধানতাৰ ফলত দুৰ্ঘটনা হ’ব পাৰে সেই সন্দৰ্ভত হিন্দীত এটা সতৰ্কবাণী জাৰি কৰিছে। পথ সুৰক্ষাৰ সজাগতা সৃষ্টিৰ বাবে ব্যৱহাৰ কৰা এই ভিডিঅ’টোত দৰ্শকসকলে খুবেই আমোদ পাইছে।

যোৱা সপ্তাহতো দিল্লী আৰক্ষীয়ে পথ দুৰ্ঘটনাৰ ঘটনা নিয়ন্ত্ৰণ কৰাত সজাগতা সৃষ্টিৰ বাবে আন এক ভিডিঅ’ টুইট কৰিছিল। ভিডিঅ’টোত এজন ব্যক্তিয়ে ট্ৰেফিকত আৱদ্ধ হৈ থকা অৱস্থাত গান গাই থকা দেখিবলৈ পোৱা গৈছিল। ভিডিঅ’টোৰ শিৰোনামত লিখা হৈছিল, “ট্ৰেফিক চিগনেলত কেনেকৈ শান্ত থাকিব লাগে…”।

টুইটাৰ ব্যৱহাৰকাৰীসকলে সজাগতা সৃষ্টিৰ বাবে দিল্লী ট্ৰেফিক পুলিচৰ এই আকৰ্ষণীয় শৈলীক উচ্চ প্ৰশংসা কৰিছে। পথ সুৰক্ষাৰ বাবে প্ৰচাৰৰ ক্ষেত্ৰত এনৃ মনোৰঞ্জনমূলক পদ্ধতিয়ে দিল্লী ট্ৰেফিক পুলিচৰ প্ৰতি টুইটাৰত ১.৪ নিযুতৰো অধিক ব্যৱহাৰকাৰীক আকৰ্ষিত কৰিছে।