ৰাষ্ট্ৰপতি দ্ৰৌপদী মুৰ্মুৰ চৰকাৰী বাসগৃহ নতুন দিল্লীৰ ৰাষ্ট্ৰপতি ভৱনে প্ৰথমবাৰৰ বাবে বিবাহ আয়োজন কৰিব। খবৰ অনুসৰি ২০২৫ চনৰ ১২ ফেব্ৰুৱাৰীত চি আৰ পি এফৰ বিষয়া পুনম গুপ্তাই তেওঁৰ বন্ধু অবিনাশ কুমাৰ নামৰ চিআৰপিএফৰ সহকাৰী কামাণ্ডেণ্টক বিয়া কৰাব।
বৰ্তমান ৰাষ্ট্ৰপতি ভৱনত পিএছঅ’ হিচাপে কৰ্মৰত চিআৰপিএফ বিষয়া পুনম গুপ্তাই ৭৪ সংখ্যক গণৰাজ্য দিৱসৰ পেৰেডত সৰ্বমহিলা দলটোক নেতৃত্ব দিয়ে। ইটিভি ভাৰতৰ তথ্য অনুসৰি ৰাষ্ট্ৰপতি দ্ৰৌপদী মুৰুৱে তেওঁৰ নিষ্ঠা, পেছাদাৰিত্ব, আৰু অনুশাসিত সেৱাৰ স্বীকৃতি স্বৰূপে ৰাষ্ট্ৰপতি ভৱনত বিবাহৰ অনুমতি প্ৰদান কৰে। এই ঐতিহাসিক অনুষ্ঠানৰ জৰিয়তে পুনম গুপ্তা ৰাষ্ট্ৰপতি ভৱনত বিবাহপাশত আবদ্ধ হোৱা প্ৰথমগৰাকী ব্যক্তি হিচাপে পৰিগণিত হ’ব।
খবৰ অনুসৰি চিআৰপিএফৰ সহকাৰী কামাণ্ডেণ্ট পুনম গুপ্তাৰ ঘৰ মধ্যপ্ৰদেশৰ। গণিতত ডিগ্ৰী লাভ কৰাৰ পিছত ইংৰাজী সাহিত্যত স্নাতকোত্তৰ আৰু বি.এড. ২০১৮ চনৰ ইউপিএছচি চিএপিএফ পৰীক্ষাত অল ইণ্ডিয়া ৰেংক ৮১ লৈ উত্তীৰ্ণ হোৱা পুনমে বৰ্তমান চিআৰপিএফত সহকাৰী কামাণ্ডেণ্ট হিচাপে কাৰ্যনিৰ্বাহ কৰি আছে আৰু বিহাৰৰ নক্সাল প্ৰভাৱিত অঞ্চলৰ লগতে অন্যান্য অঞ্চলত কাম কৰি আহিছে। তেওঁৰ দৃঢ়তা আৰু কঠোৰ পৰিশ্ৰমৰ যাত্ৰাই সমগ্ৰ দেশৰ বহু যুৱতীক অনুপ্ৰাণিত কৰে।
পুনমৰ ভাবী স্বামী অবিনাশ কুমাৰ চিআৰপিএফৰ সহকাৰী কামাণ্ডেণ্ট,তেঁও বৰ্তমান জম্মু-কাশ্মীৰত নিযুক্তিপ্ৰাপ্ত। ২০২৫ চনৰ ১২ ফেব্ৰুৱাৰীত ৰাষ্ট্ৰপতি ভৱনৰ মাদাৰ টেৰেছা ক্রাউন কমপ্লেক্সত তেওঁলোকৰ বিয়া অনুষ্ঠিত হ’ব, য’ত পৰিয়ালৰ ঘনিষ্ঠ সদস্যসকলে অংশগ্ৰহণ কৰিব।
উল্লেখ্য যে, ভাৰতৰ ৰাষ্ট্ৰপতিৰ চৰকাৰী গৃহ ৰাষ্ট্ৰপতি ভৱন দেশৰ অন্যতম গুৰুত্বপূৰ্ণ স্থাপত্যৰ চিন। ছাৰ এডউইন লুটিয়েন্সে ডিজাইন কৰা এই বিশাল বাগিচাখন ৩০০ একৰ মাটিত বিস্তৃত। মূল ভৱনটো ২ লাখ বৰ্গফুটত বিস্তৃত, চাৰি মহলাত ৩৪০টা কোঠা আছে। ইটালীৰ কুইৰিনাল পেলেচৰ পাছতে ই বিশ্বৰ দ্বিতীয় বৃহত্তম ৰাষ্ট্ৰপতিৰ বাসগৃহ।
