দ্বিতীয়টো বছৰত মহামাৰীয়ে আৰু ভয়ংকৰ ৰূপ লৈছে। বিশ্ব স্বাস্থ্য সংস্থাৰ মুৰব্বী টেড্ৰ’ছ অধানম ঘেব্ৰিয়াছুছে শুকুৰবাৰে এই কথা সদৰী কৰে।
বিশ্ব স্বাস্থ্য সংস্থাৰ মুৰব্বী গৰাকীয়ে কয় যে ভাৰতৰ কোভিড-১৯ পৰিস্থিতি খুউব উদ্বেগজনক। কেইখনমান ৰাজ্যত সংক্ৰমণে মাৰাত্মক ৰূপ লৈছে। দৈনিক হাজাৰ হাজাৰ লোক হাস্পাতালত ভৰ্তি হৈছে। সেইদৰে হাস্পাতাললৈ অহা ৰোগীৰ মৃত্যুৰ ঘটনাও বৃদ্ধি পাইছে।
তেওঁ পুনৰ সতৰ্ক কৰি দি কয় যে মহামাৰীৰ দ্বিতীয় বছৰ প্ৰথম বছৰতকৈ অধিক মাৰাত্মক হৈ পৰিব। তেওঁ সেয়েহে জনসাধাৰণক অধিক সতৰ্ক হোৱাৰ বাবে পৰামৰ্শ দিছে।
টেড্ৰ’ছে লগতে কয় যে বিশ্ব স্বাস্থ্য সংস্থাই কোভিড-১৯ৰ বিৰুদ্ধে যুঁজ দিবলৈ ভাৰতক সাহায্য আগবঢ়াইছে আৰু অক্সিজেন কন্সেন্ট্ৰেটৰ, অস্থায়ী হাস্পাতালৰ বাবে হাজাৰ হাজাৰ মাস্ক তথা আন চিকিৎসা সামগ্ৰী যোগান ধৰিছে।
বিশ্ব স্বাস্থ্য সংস্থাৰ মুৰব্বীগৰাকীয়ে ভাৰতক সাহায্য আগবঢ়োৱাৰ বাবে আন দেশসমূহকো ধন্যবাদ জ্ঞাপন কৰে।
ভাৰতকে ধৰি সমগ্ৰ বিশ্বতে এতিয়ালৈকে মাৰাত্মক কৰ’না ভাইৰাছত ৩৩লাখ ৪৬হাজাৰ ৮১৩জন লোকৰ মৃত্যু হৈছে।
আনহাতে, জাপানত এতিয়া কৰ’না মহামাৰীৰ চতুৰ্থ ঢৌ চলি আছে। দেশখনৰ স্বাস্থ্য ব্যৱস্থা ভাগি পৰিছে। দেশখনৰ ৰাজধানী টকিঅ’কে ধৰি কেইবাটাও অঞ্চলত জৰুৰী অৱস্থা জাৰি কৰা হৈছে।
নতুনকৈ দেশখনৰ হিৰ’ছিমা, ওকায়ামা আৰু হাক্কাকাইডুত জৰুৰী অৱস্থা ঘোষণা কৰা হৈছে। এনে পৰিস্থিতিত জাপানত অনুষ্ঠিত হ’বলগীয়া অলিম্পিক বাতিল কৰাৰো দাবী উত্থাপন হৈছে।
