ৰাজ্যত ক্ৰমাৎ বৃদ্ধি পাই অহা হাতী-মানুহৰ সংঘাতৰ মাজতে সোমবাৰে হোজাই জিলাত বিদ্যৎস্পৃষ্ট হৈ এটা পূৰ্ণবয়স্ক মাইকী হাতীৰ মৃত্যু হয়।
জানিব পৰা মতে, ঘটনাটো হোজাই আৰু পশ্চিম কাৰ্বি আংলঙৰ সীমান্তৰ কুম্ৰাকাটা সংৰক্ষিত বনাঞ্চলত সংঘটিত হৈছে।
প্ৰায় ৪০টামান হাতীৰ এটা জাকৰ সৈতে মাইকী হাতীটো সোমবাৰে নিশাৰ ভাগত পশ্চিম কাৰ্বি আংলঙৰ পৰা কুম্ৰাকাটা সংৰক্ষিত বনাঞ্চলতলৈ আহি আছিল।
হঠাতে মাইকী হাতীটোৰ ওলমি থকা উচ্চ ক্ষমতাসম্পন্ন বিদ্যুতৰ তাঁৰৰ সৈতে সম্পৰ্ক ঘটে আৰু বনাঞ্চলখনৰ কাষেৰে পাৰ হৈ যোৱা কপিলী নৈত বাগৰি পৰে।
উল্লেখ্য যে উচ্চ ক্ষমতাৰ এই বিদ্যুৎ সংযোগী তাঁৰ হোজাই আৰু পশ্চিম কাৰ্বি আংলঙৰ সীমান্তৰ কুম্ৰাকাটা সংৰক্ষিত বনাঞ্চলৰ মাজেৰে মাত্ৰ ১০ৰ পৰা ১২ ফুট উচ্চতাৰে পাৰ হৈ গৈছে।
ৰাতিপুৱা এই বৃহৎ জন্তুটোৰ মৃতদেহটো দেখিবলৈ পোৱা যায়।
বন বিভাগৰ বিষয়াসকলে মৰণোত্তৰ পৰীক্ষাৰ পাছত হাতীটোৰ অন্তিম সৎকাৰ কৰে।
ডিএফঅ’ পুলক চৌধুৰীয়ে কয়,’’হাতীটোৰ মৃত্যুত আমি মৰ্মাহত হৈছো। ঘটনাটো প্ৰায় ১ বজাত সংঘটিত হৈছিল। আমাৰ বন বিভাগৰ দলে নিৰন্ত এনে ঘটনা ৰোধ কৰিবলৈ কাম কৰি আছে যদিও দুৰ্ভাগ্যজনকভাৱে হাতীটো বিদ্যুতৰ তাঁৰৰ সম্পৰ্কলৈ আহে আৰু মৃত্যুমুখত পৰে।‘’
স্থানীয় লোকে বিদ্যুতৰ খুটাসমূহ ওখ কৰা হ’লে এনে ঘটনা ৰোধ কৰিব পৰা গ’লহেঁতেন বুলি অভিযোগ আনি বিদ্যুৎ বিভাগকে দোষাৰোপ কৰে।
