ৰাজ্যৰ বিভিন্ন অঞ্চলত ত্ৰাসৰ সৃষ্টি কৰাৰ বাতৰি প্ৰকাশ পাই থকাৰ সময়তে এইবাৰ হাতীয়ে সন্ত্ৰাসৰ সৃষ্টি কৰিলে ধুবুৰী জিলাৰ চাপৰ আৰু ইয়াৰ উপকণ্ঠ অঞ্চলত।
বনাঞ্চল এৰি কালিয়ে জনাঞ্চলত প্ৰৱেশ কৰি আজি সন্ধিয়ালৈকে গজৰাজে চাপৰৰ চৰ ঘূনিমাৰী, ধীৰেৰচৰ,তাৰংগাপুৰ,পুঠিমাৰী,চান্দৰডিঙা, টিলাপাৰাৰ লগতে চাপৰৰ পাৰ্শ্বৱৰ্তী বঙাইগাঁও জিলাৰ ঝাওকুৰা আৰু মাজেৰ আলগা চৰত ত্ৰাসৰ সৃষ্টি কৰে।
বনৰীয়া হাতীটোৰ আক্ৰমণত দুটাকৈ গো ধনৰ মৃত্যু হোৱাৰ লগতে বহু পশুধন গুৰুতৰ ভাৱে জখম হয়।
তদুপৰি বৃহত্তৰ অঞ্চলটোৰ বিস্তীৰ্ণ খেতি বাতি ও গজৰাজে বিস্তৰ ক্ষতিসাধন কৰে।
ইপিনে হাতীটোক বনবিভাগ তথা প্ৰশাসনে এতিয়ালৈকে নিয়ন্ত্ৰণ কৰিব পৰা নাই।
বৰ্তমান হাতীটো বিলাসীপাৰাৰ নিকটৱৰ্তী অঞ্চলত অৱস্থান লৈ আছে বুলি বন বিভাগৰ সূত্ৰই জনাইছে ।
আনহাতে এই হাতী মানুহৰ সংঘাত কেইদিনলৈ চলিব তাকে লৈ ৰাইজৰ মাজত আতংকৰ সৃষ্টি হৈ থকা পৰিলক্ষিত হৈছে।
