যোৱা জুলাই মাহত সংঘটিত সমগ্ৰ ৰাজ্য কঁপাই যোৱা শিৱসাগৰৰ ৰজনী খাৰঘৰীয়া আৰু ৰুবী খাৰঘৰীয়াৰ আত্মহননৰ ঘটনাৰ আজিও উচিত তদন্ত কৰিবলৈ সক্ষম হোৱা নাই আৰক্ষী প্ৰশাসন।
উল্লেখযোগ্য যে ঘটনাটোৰ মূল অভিযুক্ত কুলাংগাৰ পুত্ৰ দেৱাশিস খাৰঘৰীয়া আৰু বোৱাৰী গীতাশ্ৰী দুৱৰা খাৰঘৰীয়াক প্ৰায় এক মাহৰো অধিক কাল বিচাৰি শিৱসাগৰ আৰক্ষীয়ে অসমৰ বিভিন্ন স্থানত অভিযান চলায়ো সফল হ’ব পৰা নাছিল।
অৱশ্যে ইয়াৰ মাজতেই আৰক্ষীয়ে গুৱাহাটীত দেৱাশিস খাৰঘৰীয়াক গ্ৰেপ্তাৰ কৰিবলৈ সক্ষম হৈছিল যদিও আজি পৰ্যন্ত আৰক্ষীয়ে দেৱাশিসৰ পত্নী গীতাশ্ৰী দুৱৰা খাৰঘৰীয়াৰ শূংসূত্ৰ উলিয়াব পৰা নাই।
আনহাতে, শিৱসাগৰ জিলাৰ বকতা নেমুগুৰি থানাৰ অধীনৰ হলগুৰি গাঁৱৰ মোমায়েক সম্বন্ধীয় এজন আত্মীয়ৰ ঘৰত গীতাশ্ৰীয়ে কিছুদিন ধৰি আত্মগোপন কৰি আছে বুলি খবৰ পাই ৯ ছেপ্তেম্বৰত শিৱসাগৰৰ অতিৰিক্ত আৰক্ষী অধীক্ষক বলীন দেউৰী আৰু তদন্তকাৰী বিষয়া উত্তম টামাঙৰ নেতৃত্বত আৰক্ষীয়ে অভিযান চলাই যদিও গীতাশ্ৰী পুনৰবাৰ সেই স্থানৰ পৰা পলাই যাবলৈ সক্ষম হয়।
খাৰঘৰীয়া দম্পতীৰ মৃত্যুৱে সমগ্ৰ ৰাজ্যত ব্যাপক চাঞ্চল্য আৰু প্ৰতিক্ৰিয়াৰ সৃষ্টি কৰিছিল আৰু তেনেক্ষেত্ৰত আৰক্ষীয়ে আজিলৈকে অভিযুক্ত গীতাশ্ৰী খাৰঘৰীয়াক গ্ৰেপ্তাৰ কৰিব নোৱাৰাতো পৰিতাপৰ বিষয় হৈ পৰিছে।
