ডাকগাড়ীত অবৈধভাৱে মদৰ বটল সৰবৰাহ কৰাৰ দৰে তেনেই আচহুৱা ধৰণৰ ঘটনা এটাই অপৰাধৰ নতুন দিশ কিছুমান উন্মোচিত কৰিছে অসমত।
ডাকগাড়ীবোৰক সকলো তালাচীৰ পৰা ৰেহাই দিয়াটোৰ সুযোগ লৈ অপৰাধীয়ে অসমৰ পৰা “ড্ৰাই” মিজোৰামলৈ ভাৰতত উৎপাদিত বিদেশী সুৰা (ইণ্ডিয়ান মেইড ফৰেইন লিকৰ্ছ বা আই এম এফ এল) সৰবৰাহ কৰি আহিছে।
আবকাৰী বিভাগে ইয়াৰ চোৰাংচোৱাৰ সূত্ৰৰ পম খেদি সুৰাৰ অবৈধ সৰবৰাহত জড়িত ভাৰতীয় ডাক বিভাগৰ এখন মেইল ভেন (TR-01 J 1889) জব্দ কৰিছে। গাড়ীখনত বিজেপি শাসিত ৰাজ্য ত্ৰিপুৰাৰ পঞ্জীয়ন নম্বৰ আছে।
মেইল ভেনখন আই এম এফ এল অবৈধভাৱে সৰবৰাহৰ প্ৰধান আহিলা হিচাপে ব্যৱহৃত হৈ আহিছিল বুলি আবকাৰী বিষয়া এজনে নৰ্থ-ইষ্ট নাওক জনায়।
“ভাৰতীয় ডাকসেৱাৰ মেইল ভেনত আই এম এফ এল সৰবৰাহ হোৱাৰ কেইটামান ঘটনা ঘটিছে। পৰিমাণ বেছি নহয় যদিও অবৈধ সৰবৰাহৰ এই নতুন পদ্ধতিটো চিন্তনীয়। সাধাৰণতে ডাকগাড়ী কোনেও তালাচী নচলায়”, বিষয়াজনে কয়।
আবকাৰী মন্ত্ৰী পৰিমল শুক্লবৈদ্যই অভিযানকাৰী দলটোক সফল অভিযানটোৰ বাবে প্ৰশংসা কৰিছে।
“আমি ইতিপূৰ্বে এখন উচ্চ স্তৰীয় তদন্তৰ বাবে নিৰ্দেশ দিছো। অপৰাধীসকলক সোনকালেই কৰায়ত্ত কৰা হ’ব”, শুক্লবৈদ্যই কয়।
উল্লেখ কৰিব পাৰি যে মিজোৰাম এখন ড্ৰাই ষ্টেইট, অৰ্থাৎ ৰাজ্যখনত বাণিজ্যিকভাৱে প্ৰস্তুত কৰা মদ মুকলিকৈ বিক্ৰী কৰা নিষিদ্ধ। ৰাজ্যখনৰ শাসনলৈ নতুনকৈ অহা মিজো নেশ্যনেল ফ্ৰণ্ট (এম এন এফ) চৰকাৰে ২০১৮ চনৰ ডিচেম্বৰত মদ নিষিদ্ধ ঘোষণা কৰে। পূৰ্বেও ১৯৯৭ চনৰ পৰাই ৰাজ্যখন ড্ৰাই ষ্টেইট ঘোষিত হৈ আছিল যদিও ২০১৫ চনত কংগ্ৰেছ শাসনলৈ আহি সেই নিষিদ্ধতা উঠাই লৈছিল।
আনহাতে বিজেপি শাসিত অসম আৰু ত্ৰিপুৰাত মদৰ বিক্ৰী নিষিদ্ধ নহয়।
