জাৰ্মানীৰ মূল বন্দৰ চহৰ হামবাৰ্গত ছুৰীৰে আক্ৰমণ কৰি ১৮ জন লোকক আহত কৰিছে এগৰাকী মহিলাই। আৰক্ষীয়ে গ্ৰেপ্তাৰ কৰিছে ৩৯ বছৰীয়া মহিলাগৰাকীক। আহতসকলৰ ভিতৰত ৬ জনৰ অৱস্থা সংকটজনক।
শুকুৰবাৰে মহানগৰীখনৰ কেন্দ্ৰীয় ৰেল ষ্টেচনত সংঘটিত হয় এই ঘটনা।
হামবাৰ্গ আৰক্ষীয়ে জনোৱা মতে, অভিযুক্ত মহিলাগৰাকীয়ে অকলেই এই আক্ৰমণ সংঘটিত কৰিছিল। শুকুৰবাৰে গ্ৰেপ্তাৰ হোৱাৰ পিছত তেওঁক আৰক্ষীৰ জিম্মালৈ প্ৰেৰণ কৰা হয়। শনিবাৰে আদালতত হাজিৰ কৰাৰ কথা।
শুকুৰবাৰে হামবাৰ্গ আৰক্ষীয়ে এক বিবৃতিত কয়, “ৰাতিপুৱা মহিলাগৰাকীয়ে হামবাৰ্গ চেণ্ট্ৰেল ষ্টেচনত প্ৰৱেশ কৰি তেওঁৰ সন্মুখত পোৱা যিকোনো ব্যক্তিক আক্ৰমণ কৰিছিল। আমি তেওঁক গ্ৰেপ্তাৰ কৰিছো আৰু এই কাণ্ডৰ তদন্ত কৰি আছো। এই সময়ত আমাৰ হাতত আৰু কোনো তথ্য নাই। তদন্তৰ পিছত আমি অধিক সবিশেষ দিব পাৰিম।”
হামবাৰ্গ আৰক্ষীয়ে মহিলা আক্ৰমণকাৰীৰ নাম প্ৰকাশ কৰা নাই। অৱশ্যে চিএনএনৰ জাৰ্মান শাখা আৰটিএলক এজন আৰক্ষী বিষয়াই কয় যে মহিলাগৰাকী জাৰ্মান নাগৰিক আৰু প্ৰাৰম্ভিক তদন্তত দেখা গৈছে যে এই আক্ৰমণৰ আঁৰত কোনো ৰাজনৈতিক উদ্দেশ্য নাই।
