আত্মহত্যাৰ ঘাটিত পৰিণত হৈছে ময়িদুল ইছলাম বড়া সেতু; দিখৌত পুনৰ জাপ দিলে এগৰাকী বৃদ্ধাই
শিৱসাগৰৰ দিখৌ দলঙৰ পৰা আজি এগৰাকী বৃদ্ধাই জাপ দি আত্মহত্যা কৰে। দলঙৰ ওপৰত নিজৰ ছেণ্ডেল খুলি পকী দলঙৰ পৰা জাপ মাৰে।
স্থানীয় লোকে বাঁহ দি মহিলা গৰাকীক বচাবলৈ চেষ্টা কৰিছিল যদিও মহিলাগৰাকীয়ে বাঁহ ডাল ধৰাৰ পৰিৱৰ্তে আঁতৰাই দিয়ে আৰু মুহূৰ্ততে পানীত বুৰ যায়।
এই ঘটনাই শিৱসাগৰত তীব্ৰ চাঞ্চল্যৰ সৃষ্টি কৰিছে। বৰ্তমানলৈকে চিনাক্ত কৰিব পৰা হোৱা নাই মহিলা গৰাকীক।
ইফালে এছ ডি আৰ এফে দিখৌ নদীত উদ্ধাৰ অভিযান চালাই আছে যদিও বাতৰি লিখা সময়লৈকে বৃদ্ধাগৰাকীক উদ্ধাৰ কৰিবলৈ সক্ষম হোৱা নাই।
ইফালে দৈনিক সংঘটিত হ’ব ধৰিছে ময়িদুল ইছলাম বড়া সেতুৰ পৰা দিখৌত জাপ দি আত্মহত্যাৰ ঘটনা। এতিয়ালৈকে প্ৰায় ১৬ গৰাকী পুৰুষ-মহিলাই এই দলঙৰ পৰা জাপ দি আত্মহত্যা কৰিছে। কিন্তু শিৱসাগৰ জিলা প্ৰশাসনে আজিলৈকে কোনো ব্যৱস্থা গ্ৰহণ কৰা নাই এনে ধৰণৰ ঘটনা ৰোধৰ বাবে।
দিখৌ দলঙৰ পৰা জাপ দি আত্মহত্যা কৰা ঘটনা ৰোধৰ বাবে শিৱসাগৰ জিলা প্ৰশাসনক ব্যৱস্থা গ্ৰহণ কৰিবলৈ দাবী জনাইছে আহোম ৰয়েল চ’ছাইটিৰ শিৱসাগৰ জিলা সমিতিৰ সভাপতি মণিৰুল ইছলাম বড়ায়ে। লগতে সংগঠনটোৱে ময়িদুল ইছলাম বড়া সেতুৰ দুয়ো কাষে লোহাৰ জালি নিৰ্মাণ কৰিবলৈ দাবী জনাইছে।