পাৰিবাৰিক সংঘাতে ব্যক্তিৰ জীৱনলৈ কেনে এক পৰিস্থিতি কঢ়িয়াই আনে তাৰ এক মৰ্মান্তিক উদাহৰণ পোৱা গৈছে উত্তৰ প্ৰদেশত। ৰাজ্যখনৰ ৰায়বৰেলীত দুগৰাকী কন্যাৰ সৈতে চিলিঙত ওলমি থকা অৱস্থাত পোৱা গৈছে এগৰাকী মহিলাক।
অভিযোগ অনুসৰি ৩২ বছৰীয়া মহিলাগৰাকীয়ে তেওঁৰ দুয়োগৰাকী জীয়েকক হত্যা কৰাৰ পিছত নিজেও আত্মহত্যা কৰে।
মৃত মহিলাগৰাকীক বিতানা বুলি চিনাক্ত কৰা হৈছে। আনহাতে তেওঁৰ দুয়োগৰাকী জীক ক্ৰমে জাহ্নৱী আৰু সৌমিয়া বুলি চিনাক্ত কৰা হৈছে।
স্থানীয় ৰাইজৰ ভাষ্য অনুসৰি মহিলাগৰাকীয়ে পাৰিবাৰিক সংঘৰ্ষৰ বাবেই এই চৰম পদক্ষেপ লৈছিল।
মঙলবাৰে পুৱা মহিলাগৰাকীৰ শাহুৱেকে ঘৰৰ ভিতৰত ওলমি থকা মৃতদেহ তিনিটা উদ্ধাৰ কৰিছিল।
মৃত মহিলাগৰাকীৰ স্বামী সুখদেৱে লুধিয়ানাৰ ওচৰত শ্ৰমিক হিচাপে কাম কৰে। এই চাঞ্চল্যকৰ ঘটনাৰ খবৰ পোৱাৰ লগে লগে তেওঁ নিজ বাসস্থানত উপস্থিত হয়।
ইফালে এই খবৰ আৰক্ষীক জনোৱাৰ পিছতে ৰায়বৰেলী আৰক্ষী ঘটনাস্থলীত উপস্থিত হয়। আৰক্ষীৰ আগত সুখদেৱে কিয় এই চৰক কাণ্ড সংঘটিত হৈছিল তাৰ কোনো ধাৰণা নাই বুলি মন্তব্য কৰে।
প্ৰাথমিক সোধা-পোছাৰ পাছতে আৰক্ষীয়ে মৃতদেহ তিনিটা মৰণোত্তৰ পৰীক্ষাৰ বাবে প্ৰেৰণ কৰে। ইতিমধ্যে আৰক্ষীয়ে বিষয়টোৰ তদন্ত আৰম্ভ কৰিছে।
