ঠিক যেন বলীউডৰ ব্লকবাষ্টাৰ চিনেমা ‘দৃশ্যম’ৰ এটা দৃশ্য। ক্ৰাইম থ্ৰিলাৰ চিনেমাখনৰ নায়কে পৰিয়ালটোৰ দুজন সদস্যক হত্যা কৰি মৃতদেহ মাটিত পুতি থৈছিল। মহাৰাষ্ট্ৰতো সংঘটিত হৈছে একেধৰণৰ এটা ঘটনা।
প্ৰেমিকৰ সহায়ত এগৰাকী মহিলাই স্বামীক হত্যা কৰাৰ অভিযোগ উঠিছে। ঘৰৰ ভিতৰতে মৃতদেহটো সমাধিস্থ কৰা হয়। মৃতদেহটো টাইলছৰ তলত পুতি থোৱা হয়। সোমবাৰে পুৱা টাইলছ ভাঙি মাটি খান্দি মৃতদেহটো উদ্ধাৰ কৰে আৰক্ষীয়ে। এই ঘটনা সংঘটিত হৈছে মহাৰাষ্ট্ৰৰ পালঘৰ জিলাত।
আৰক্ষীৰ সূত্ৰ অনুসৰি মৃত লোকজনৰ নাম বিজয় চৌহান (৩৪)। যোৱা দুসপ্তাহ ধৰি তেওঁক বিচাৰি পোৱা হোৱা নাছিল। তেওঁ পত্নী কোমল চৌহানৰ সৈতে মুম্বাইৰ পৰা প্ৰায় ৭০ কিলোমিটাৰ নিলগৰ নাল্লাচোপাৰাৰ গাংগানীপাৰা অঞ্চলৰ এখন হাউছিং ছ’চাইটিত বাস কৰিছিল।
বাতৰি অনুসৰি, বিজয়ৰ এগৰাকী ভাতৃয়ে তেওঁক কেইবাদিনো বিচাৰি নাপাই তালৈ আহিছিল। বিজয়ক বিচাৰি নাপাই তেওঁ দেওবাৰে নিশা তাত থকা থানাত নিৰুদ্দেশ ডায়েৰী দাখিল কৰে। সোমবাৰে পুৱা তালৈ গৈছিল আৰক্ষী। ঘৰত সোমাওঁতে দেখিলে ঘৰৰ মজিয়াৰ টাইলছৰ ৰং এঠাইত অলপ বেলেগ। এই কথা দেখি আৰক্ষী বিষয়াসকলৰ সন্দেহ উপজিল। লগে লগে ঠাইখিনি ভাঙি পেলোৱা হয়। তাৰ পৰাই বিজয়ৰ মৃতদেহ উদ্ধাৰ কৰা হয়।
জনা গৈছে যে মনু শৰ্মা নামৰ চুবুৰীয়া এজনৰ লগত কোমলৰ সম্পৰ্ক গঢ় লৈ উঠিছিল। অভিযোগ অনুসৰি মনুৰ সৈতে কোমলে স্বামীক হত্যা কৰি মৃতদেহ টাইলছৰ তলত মাটিত পুতি থৈছিল।
তাত থকা এম বি ভি ভি থানাৰ এজন বিষয়াই কয় যে তেওঁলোকৰ মতে বিজয়ক কমেও ২ সপ্তাহ আগতে হত্যা কৰা হৈছিল। তাত থকা বিষয়াসকলৰ উপস্থিতিত টাইলছ ভাঙি মৃতদেহটো উদ্ধাৰ কৰা হয়। ঘটনাৰ পিছৰে পৰা কোমল আৰু মনুৰ কোনো সন্ধান পোৱা নাই বুলিও তেওঁ কয়। দুয়োজনেই পলায়ন কৰা বুলি জানিব পৰা গৈছে। তেওঁ কয় যে ঘটনাৰ তদন্তৰ উপৰিও বিজয়ৰ পত্নী আৰু প্ৰেমিকৰ সন্ধানো অব্যাহত আছে।
অৱশ্যে বিজয় হত্যাৰ কাৰণ এতিয়াও আৰক্ষীৰ বাবে স্পষ্ট হোৱা নাই। সূত্ৰ অনুসৰি বিজয়ক হত্যা কৰাৰ বাবে কোমল আৰু মনুকে প্ৰাথমিকভাৱে সন্দেহ কৰা হৈছে। অৱশ্যে এই ক্ষেত্ৰত অন্ততঃ আন এজন স্থানীয় লোক জড়িত থকাৰ সন্দেহ কৰিছে আৰক্ষীয়ে।
