প্ৰেমৰ সম্পৰ্কক আৰু এঢাপ আগুৱাই নিবলৈ এক প্ৰেমিক যুগলে বিয়াৰ সিদ্ধান্ত লৈছিল। বিবাহক লৈ প্ৰত্যেকৰে এক সুকীয়া অনুভৱ আৰু সপোন থাকে। এনেকুৱাই আছিল টাইৱানৰ ইউ নামৰ এগৰাকী যুৱতীৰ সপোন। কিন্তু সংসাৰ গঢ়াৰ আগতেই সকলো শেষ।
যোৱা ১৫ জুলাইত এক গাড়ী দুৰ্ঘটনাত প্ৰেমিকৰ মৃত্যু হয়। সেই দুৰ্ঘটনাটোত প্ৰেমিকা ইউও জড়িত আছিল। সৌভাগ্যক্ৰমে তেওঁ বাচিল। কিন্তু প্ৰেমিকৰ মৃত্যুত তেওঁ শোকত পৰিল। সেয়ে তেওঁ মৃত প্ৰেমিকৰ আত্মাৰ লগত বিবাহ (ghost wedding) অনুষ্ঠানৰ আয়োজন কৰিছে। তাৰমানে মৃত প্ৰেমিককে বিয়া কৰাব যুৱতীগৰাকীয়ে। শোকত ভাগি পৰাৰ মাজতে তেওঁ ভালপোৱাজনক শ্ৰদ্ধা জনোৱাৰ বাবে এনে সিদ্ধান্ত লয়।
জনা যায় যে এই ঘোষ্ট ৱেডিং চীনত ৩০০০ বছৰ পুৰণি পৰম্পৰা। বিশ্বাস কৰা হয় যে যদি কোনো ব্যক্তিয়ে কোনো কাম আধৰুৱা কৰি মৃত্যুবৰণ কৰে তেন্তে তেওঁৰ আত্মাই শান্তি নাপায়। বিশেষকৈ বিবাহৰ ক্ষেত্ৰত। সেই পৰম্পৰাক সন্মান জনাই প্ৰয়াত প্ৰেমিকৰ বৃদ্ধ মাতৃৰ যত্ন লোৱাৰ সিদ্ধান্ত লয় ইউ-য়ে। মৃত প্ৰেমিকৰ ছবি আৰু সাজ-পোছাক সন্মুখত ৰাখি এই ধৰণৰ বিবাহ অনুষ্ঠান সম্পন্ন কৰা হয়।
এই পৰম্পৰাৰ দুটা দিশ আছে। এটা, বিয়াৰ আগতে বা বিয়াৰ সময়ত যেতিয়া এহাল দম্পতীয়ে একেলগে মৃত্যুবৰণ কৰে। ইয়াৰ পিছত তেওঁলোকৰ পৰিয়ালে বিবাহ অনুষ্ঠানৰ আয়োজন কৰি তেওঁলোকক একেলগে সমাধিস্থ কৰে। আনটো, যেতিয়া দম্পতীহালৰ এজনৰ মৃত্যু হয়, আনজন জীয়াই থাকে তেন্তে তেওঁলোকৰ পৰিয়ালে মৃতকৰ লগত আনজনৰ বিবাহৰ ব্যৱস্থা কৰে।
প্ৰসংগক্ৰমে জনা গৈছে যে টাইৱানৰ ঘাইপথত এই দুৰ্ঘটনাটো সংঘটিত হৈছিল। সেই সময়ত গাড়ীখনত পাঁচজন মানুহ আছিল। প্ৰেমিকৰ লগত তেওঁৰ ভনীয়েকো আছিল। তাত আহত তিনিজনক উদ্ধাৰ কৰিবলৈ সক্ষম হয় ইউ-য়ে। কিন্তু প্ৰেমিকক উদ্ধাৰ কৰিব নোৱাৰিলে। এই দুৰ্ঘটনাত প্ৰেমিক আৰু তেওঁৰ ভগ্নীৰ মৃত্যু হয়। মৃত প্ৰেমিকৰ মাতৃয়ে একেলগে দুটা সন্তান হেৰুৱাই শোকস্তব্ধ হৈ পৰে। সেয়ে ইউৱে সিদ্ধান্ত লয় যে তেওঁ নিজৰ প্ৰয়াত প্ৰেমিকক বিয়া কৰাব। আৰু তেওঁৰ বৃদ্ধা মাতৃক চোৱাচিতা কৰিব।
