সোমবাৰে সন্ধিয়া প্ৰধানমন্ত্ৰী নৰেন্দ্ৰ মোডীৰ অধ্যক্ষতাত নতুন দিল্লীৰ সংসদৰ এনেক্স হলত কেন্দ্ৰীয় কেবিনেটৰ এক গুৰুত্বপূৰ্ণ বৈঠক অনুষ্ঠিত হয়। কেবিনেট বৈঠকৰ কাৰ্যসূচী প্ৰকাশ কৰা হোৱা নাই। অৱশ্যে সূত্ৰ অনুসৰি কেন্দ্ৰীয় কেবিনেট বৈঠকত মহিলাৰ বাবে ৩৩ শতাংশ সংৰক্ষণৰ প্ৰস্তাৱত অনুমোদন জনোৱা হয়।
তদুপৰি, সংসদৰ বিশেষ অধিৱেশনত দাখিল কৰিবলগীয়া বিধেয়কসমূহৰ ওপৰত এই বৈঠকত আলোচনা কৰা হয়। সংসদৰ বিশেষ অধিৱেশনৰ মাজত হোৱা এই বৈঠকে নতুন দিল্লীৰ ৰাজনৈতিক মহলত উত্তাপ বৃদ্ধি কৰিছে।
বিশেষ অধিৱেশন ঘোষণাৰ পিছৰে পৰা বিৰোধী দলসমূহে ২০২৪ চনৰ লোকসভা নিৰ্বাচনৰ পূৰ্বে কেন্দ্ৰই এক বৃহৎ পদক্ষেপৰ পৰিকল্পনা কৰা বুলি আশংকা প্ৰকাশ কৰিছে। সেই জল্পনা-কল্পনা এই বৈঠকৰ পিছত আৰু বৃদ্ধি পাইছে।
মহিলা সংৰক্ষণ বিধেয়কত লোকসভা আৰু ৰাজ্যিক বিধানসভাৰ মুঠ আসনৰ ৩৩ শতাংশ বা এক তৃতীয়াংশ মহিলাৰ বাবে সংৰক্ষিত কৰাৰ প্ৰস্তাৱ দিয়া হৈছে। এই ৩৩ শতাংশ সংৰক্ষণত অনুসূচিত জাতি, জনজাতি আৰু এংলো-ইণ্ডিয়ানৰ বাবেও সংৰক্ষণ অন্তৰ্ভুক্ত কৰা হৈছে।
প্ৰতিটো লোকসভা নিৰ্বাচনৰ পিছত সংৰক্ষিত আসন সলনি কৰিব লাগে বুলিও বিধেয়কখনত উল্লেখ আছে। সংসদৰ বিশেষ অধিৱেশনৰ প্ৰথম দিনাই কেইবাটাও দলে মহিলা সংৰক্ষণ বিধেয়ক সংসদত উত্থাপন কৰাৰ বাবে হেঁচা প্ৰয়োগ কৰে। সূত্ৰ অনুসৰি অহা ২০ ছেপ্টেম্বৰত সংসদৰ বিশেষ অধিৱেশনৰ সময়ত মহিলা সংৰক্ষণ বিধেয়ক দাখিল কৰা হ’ব।
ইয়াৰ পূৰ্বে সংসদৰ পাঁচদিনীয়া বিশেষ অধিৱেশনৰ প্ৰথম দিনাই প্ৰধানমন্ত্ৰীয়ে লোকসভাত ভাষণ প্ৰদান কৰে। তেওঁ সংসদৰ দুয়োটা সদনৰ ইতিহাস আৰু বিভিন্ন তাৎপৰ্যৰ ওপৰত আলোকপাত কৰে। আৱেগিক ভাষণত প্ৰধানমন্ত্ৰী মোদীয়ে পূৰ্বৰ প্ৰধানমন্ত্ৰীসকলক স্মৰণ কৰে। ২০১৪ চনত প্ৰথমবাৰৰ বাবে সংসদত প্ৰৱেশ কৰি লোকসভা নিৰ্বাচনত জয়ী হোৱা মুহূৰ্তটোও তেওঁ উল্লেখ কৰে।
আটাইতকৈ তাৎপৰ্যপূৰ্ণ কথাটো হ’ল ১৯৭১ চনত বাংলাদেশ মুক্তিযুদ্ধৰ সময়ত প্ৰাক্তন প্ৰধানমন্ত্ৰী ইন্দিৰা গান্ধীৰ নেতৃত্বও প্ৰধানমন্ত্ৰী মোডীৰ ভাষণত আহিছিল। অৱশ্যে একে সময়তে তেওঁ ১৯৭৫ চনত ইন্দিৰা চৰকাৰে জাৰি কৰা জৰুৰীকালীন অৱস্থাৰ কথাও উল্লেখ কৰে। ভাৰতৰ প্ৰথম প্ৰধানমন্ত্ৰী জৱাহৰলাল নেহৰুৰ প্ৰশংসাও তেওঁৰ ভাষণত শুনা যায়। বৰ্তমানৰ প্ৰধানমন্ত্ৰীয়ে নেহৰুৰ বিখ্যাত ‘এট দ্য ষ্ট্ৰ’ক অফ মিডনাইট’ ভাষণৰ প্ৰশংসা কৰে।
সংসদৰ বিশেষ অধিৱেশন ঘোষণা হোৱাৰ লগে লগে বিৰোধী দল, ৰাজনৈতিক পৰ্যবেক্ষক আৰু সৰ্বোপৰি সাধাৰণ নাগৰিকৰ মাজত জল্পনা-কল্পনাৰ সৃষ্টি হৈছিল যে চৰকাৰে ইউনিফৰ্ম চিভিল কোড বা ৱান নেচন ৱান ইলেকচনৰ দৰে কোনো ডাঙৰ সিদ্ধান্ত ঘোষণা কৰিব পাৰে। জি-২০ৰ ৰাতিৰ আহাৰত ৰাষ্ট্ৰপতিৰ আমন্ত্ৰণ পত্ৰৰ খেও ধৰি দেশৰ নাম সলনিৰ কথাও উত্থাপন হয়। ইণ্ডিয়া শব্দটো দেশৰ নাম হিচাপে বাদ দিয়াৰ সংকল্প চৰকাৰে আনিব পাৰে বুলি বিভ্ৰান্তিৰ সৃষ্টি হয়।
অৱশ্যে সংসদৰ বিশেষ অধিৱেশনৰ কাৰ্যসূচী ইতিমধ্যে প্ৰকাশ কৰিছে চৰকাৰে। বিশেষ অধিৱেশনত আলোচনাৰ বাবে চৰকাৰে তালিকাভুক্ত কৰা গুৰুত্বপূৰ্ণ বিধেয়কসমূহৰ ভিতৰত মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্তৰ নিযুক্তি সন্দৰ্ভত এখন বিতৰ্কিত বিধেয়ক আছে। ইয়াৰ উপৰিও আছে ‘অধিবক্তা (সংশোধনী) বিল, ২০২৩’ আৰু ‘দ্য প্ৰেছ এণ্ড ৰেজিষ্ট্ৰেচন অৱ পেৰিয়’ডিকেলছ বিল, ২০২৩’। অৱশ্যে চৰকাৰে ইচ্ছা কৰিলে এই তালিকাত আৰু কিছু বিল যোগ কৰিব পাৰে। আন বিষয়কলৈয়ো আলোচনা হ’ব পাৰে।
