যৌন নিৰ্যাতন চলাই নৃশংস হত্যা! মন্দিৰ চৌহদত ১০০টা গণ-সমাধি! নাৰীদেহৰ কংকাল…
মন্দিৰ চৌহদত গণ-সমাধি! এটা বা দুটা নহয়! ১০০ টা গণ সমাধি! উদ্ধাৰ কংকাল! সকলো নাৰীদেহৰ কংকাল! আৰু এই ঘটনাৰ আধাৰত কৰ্ণাটকৰ জনপ্ৰিয় তীৰ্থস্থান ধৰ্মস্থল সন্দৰ্ভত চৰ্চালৈ আহিছে ভয়ংকৰ অভিযোগ।
অভিযোগ অনুসৰি বছৰ বছৰ ধৰি মন্দিৰ চৌহদত শতাধিক নাৰীক ধৰ্ষণ আৰু হত্যা কৰা হৈছে। আৰু এই ভয়ংকৰ অভিযোগে সমগ্ৰ দেশতে আলোড়নৰ সৃষ্টি কৰিছে।
মন্দিৰৰ এগৰাকী প্ৰাক্তন চাফাই কৰ্মীয়ে এই দাবী কৰিছে। তেওঁ দাবী কৰে যে ১৯৯৫ চনৰ পৰা ২০১৪ চনলৈকে তেওঁ মন্দিৰ কৰ্তৃপক্ষৰ প্ৰভাৱশালী লোকৰ নাৰকীয় নিৰ্যাতনৰ বলি হোৱা ছোৱালীকে ধৰি মহিলাৰ মৃতদেহ সমাধিস্থ কৰিছিল আৰু আনকি কিছুমানক জ্বলাই দিছিল।
তেওঁ দাবী কৰে যে নিৰ্যাতন আৰু হত্যা কৰা মহিলাৰ সংখ্যা ১০০ তকৈ অধিক হোৱাৰ সম্ভাৱনা আছে। শেহতীয়াকৈ তেওঁ কিছুমান কংকাল খান্দি উলিয়াইও আনিছে।
তেওঁ অভিযোগ কৰে যে, “বহুত মহিলাৰ শৰীৰত নূন্যতম কাপোৰ বা অন্তৰ্বাসো নাছিল। যৌন নিৰ্যাতন আৰু নৃশংস হত্যাৰ স্পষ্ট লক্ষণ দেখা গৈছিল। হয় ডিঙি চেপি হত্যা কৰা হৈছিল, নহয় শৰীৰত আঘাত পোৱাৰ বাবে তেজ ওলাই মৃত্যুমুখত পৰিছিল। ইয়াৰ পৰা ভয়ংকৰ হিংসাৰ ইংগিত পোৱা যায়।
ছাত্ৰীকে ধৰি ১০০ৰো অধিক মহিলাক ধৰ্ষণ, হত্যা আৰু সমাধিস্থ কৰা হৈছিল। আনকি নাবালিকাও আছিল।” এই কথাই তেওঁ অভিযোগ পত্ৰত লিখিছে। তেওঁৰ অভিযোগৰ সমৰ্থনত তেওঁ ধৰ্মস্থলী আৰক্ষীক কংকালৰ অৱশিষ্টৰ ফটোও প্ৰদান কৰে।
উল্লেখ্য যে কৰ্ণাটকৰ এক গুৰুত্বপূৰ্ণ তীৰ্থস্থান ধৰ্মস্থল। কৰ্ণাটকৰ বাহিৰৰ পৰাও এই তীৰ্থস্থানৰ আকৰ্ষণৰ বাবে ইয়ালৈ আহে। নগৰৰ মাজমজিয়াত অৱস্থিত ধৰ্মস্থল ভগৱান মঞ্জুনাথৰ মন্দিৰ। জনা যায় যে এই মন্দিৰ পৰিচালনাৰ দায়িত্ব আছে এটা প্ৰভাৱশালী পৰিয়াল।
প্ৰাক্তন ছাফাই কৰ্মীগৰাকীয়ে দাবী কৰে যে একাংশ অপৰাধী মন্দিৰ প্ৰশাসনৰ সৈতেও জড়িত। প্ৰায় দুটা দশক ধৰি তেওঁ অগণন ভুক্তভোগীৰ মৃতদেহ সমাধিস্থ কৰিবলৈ বা জ্বলাই দিবলৈ বাধ্য হৈছিল। লগতে তেওঁ এই নিৰ্দেশ পালন নকৰিলে মৃত্যুৰ ভাবুকি দিয়াৰ অভিযোগ উত্থাপন কৰে।
২০০৩ চনত এম বি বি এছৰ প্ৰথম বৰ্ষৰ এগৰাকী ছাত্ৰী কলেজৰ পৰা ধৰ্মস্থললৈ ভ্ৰমণলৈ আহোতে সন্ধানহীন হৈছিল। প্ৰাক্তন ছাফাই কৰ্মীগৰাকীয়ে মুখ খোলাৰ পিছত ছাত্ৰীগৰাকীৰ পৰিয়ালেও তেওঁলোকৰ কন্যা নিৰুদ্দেশৰ ৰহস্যৰ নতুন তদন্তৰ দাবী জনাইছে। এই ঘটনাত এছ আই টিৰ তদন্তৰ বাবে এখন আৱেদনো মুখ্যমন্ত্ৰী সিদ্দাৰামাইয়াৰ ওচৰত দাখিল হৈছে।