ৰাজ্যিক পক্ষী সুৰক্ষা সমিতি, অসমৰ উদ্যোগত মহানগৰীৰ ৰাধাগোবিন্দ বৰুৱা পথৰ জোনালীস্থিত সনাতন ধৰ্ম সভা প্ৰাংগনত অনুষ্ঠিত হ’ব বিশ্ব পক্ষী দিৱস।
অহা ১ আৰু ৩ জুলাই, মঙলবাৰ আৰু বৃহস্পতিবাৰে দুদিনীয়া কাৰ্যসূচীৰে আড়ম্বৰপূৰ্ণভাৱে উদযাপন কৰা হ’ব ত্ৰয়োবিংশতিতম বিশ্ব পক্ষী দিৱস।
এই উপলক্ষে কটন বিশ্ববিদ্যালয়ৰ প্ৰাক্তন অধ্যাপক ডঃ অমূল্য বৰ্মনক সভাপতি আৰু নগেন চন্দ্ৰ শৰ্মাক মুখ্য সম্পাদক হিচাপে লৈ এখন শক্তিশালী উদযাপন সমিতি গঠন কৰা হৈছে।
বৰ্ণাঢ্য কাৰ্যসূচীৰে পালন কৰিবলগীয়া বিশ্ব পক্ষী দিৱস উপলক্ষে সমিতিয়ে ‘পক্ষী সংবাদ’ শীৰ্ষক এখন স্মৃতিগ্ৰন্থ প্ৰকাশৰ পদক্ষেপ গ্ৰহণ কৰিছে।
কাৰ্যসূচী সৰ্বতোপ্ৰকাৰে সফল কৰি তুলিবলৈ আৰ জি বৰুৱা ৰোডৰ জ্যোতি উপ পথত থকা ৰাজ্যিক পক্ষী সুৰক্ষা সমিতি, অসমৰ কাৰ্যালয় প্ৰাংগনত আজি বিশ্ব পক্ষী দিৱস উদযাপন সমিতিৰ এখন গুৰুত্বপূৰ্ণ বৈঠক অনুষ্ঠিত হয়।
সভাত পক্ষী সুৰক্ষা সমিতিৰ সভাপতি, পক্ষীবিদ ভুৱনেশ্বৰ শৰ্মা, ড০ অমূল্য বৰ্মন, নগেন চন্দ্ৰ শৰ্মা, ড০ খৈয়াম উদ্দিন আহমেদ, আব্দুল আলিমৰ লগতে আন কেইবাগৰাকী সদস্যই অনুষ্ঠান সফল কৰি তোলাৰ বাবে পৰামৰ্শমূলক বক্তব্য দাঙি ধৰে।
পক্ষীবিদ ভুৱনেশ্বৰ শৰ্মাই জানিবলৈ দিয়ে যে ৰাজ্যিক পক্ষী সুৰক্ষা সমিতি, অসমৰ তৎপৰতাত শীঘ্ৰেই পক্ষী বিষয়ক বিশ্বকোষ প্ৰণয়নৰ আঁচনি গ্ৰহণ কৰা হ’ব। এই বিশ্বকোষৰ প্ৰকাশ অসমীয়া সাহিত্যৰ ইতিহাসত এক নতুন সংযোজন হ’ব বুলি পক্ষীবিদ গৰাকীয়ে আশা ব্যক্ত কৰে।
