বিশ্বৰ বিভিন্ন প্ৰান্তৰৰ লগতে বৃহস্পতিবাৰে কাজিৰঙা ৰাষ্ট্ৰীয় উদ্যান ও ব্যঘ্ৰ সংৰক্ষিত বনাঞ্চলতো আন্ত:ৰাষ্ট্ৰীয় প্ৰাইমেট দিৱস উদযাপন কৰা হয় ৷ এই উপলক্ষে পুৱাতে কাজিৰঙাৰ কাষৰীয় মহাবিদ্যালয় সমুহৰ পৰা একাংশ ছাত্ৰ-ছাত্ৰীক পূৱ অসম বন্যপ্ৰাণী সংমণ্ডলৰ পানবাৰী সংৰক্ষিত বনাঞ্চললৈ হলৌ বান্দৰ, টুপীমুৰীয়া বান্দৰকে ধৰি বিভিন্ন প্ৰজাতিৰ বান্দৰ দেখুৱাবৰ বাবে লৈ যোৱা হয় ৷
পানবাৰী বনাঞ্চলত ট্ৰেকিং কৰাৰ প্ৰাকক্ষণত আয়োজিত এক অনুষ্ঠানত কাজিৰঙাৰ সহকাৰী বন সংৰক্ষক চিৰঞ্জীৱ জৈন, কহঁৰাৰ বনাঞ্চলিক বিয়য়া ডাঃ বিভুতি ৰঞ্জন গগৈ, কৰবেট ফাউণ্ডেচনৰ উপ সঞ্চালক ডাঃ নবীন পাণ্ডে, জেষ্ঠ সাংবাদিক প্ৰকৃতিবিদ উত্তম শইকীয়া, কৰবেট ফাউণ্ডেচনৰ সমন্বয়ক সুমন্ত কুণ্ডু আৰু দিব্যজ্যোতি শইকীয়া উপস্থিত থাকে ৷
পৰৱৰ্তী সময়ত সমল ব্যক্তিৰ নেতৃত্বত তিনিটা দলত বিভক্ত হৈ ছাত্ৰ-ছাত্ৰী সকলে পানবাৰী সংৰক্ষিত বনাঞ্চলৰ সীমাৰে ট্ৰেকিং কৰি বান্দৰ প্ৰজাতিৰ বিষয়ে সমল ব্যক্তি সকলৰ পৰা পাঠ গ্ৰহণো কৰে ৷
এই কাৰ্যসুচীত কাজিৰঙাৰ চৰকাৰী আদৰ্শ মহাবিদ্যালয়, বোকাখাতৰ জে ডি এছ জি মহাবিদ্যালয় আৰু চি এন বি মহাবিদ্যালয়ৰ ছাত্ৰ-ছাত্ৰী আৰু শিক্ষক-শিক্ষয়ত্ৰীয়েও অংশগ্ৰহণ কৰে ৷ ট্ৰেকিংৰ সময়ত ছাত্ৰ-ছাত্ৰী সকলে পানবাৰী সংৰক্ষিত বনাঞ্চলৰ টুপীমুৰীয়া বান্দৰ আৰু মালয়ান কেৰ্কেটুৱাও দৰ্শন কৰে ৷
লগতে পঢ়ক: কণ্ঠশিল্পী কল্পনা পাটোৱাৰীৰ বিৰুদ্ধে মানহানিৰ গোচৰ ৰুজু
ট্ৰেকিংৰ পিছতে কহঁৰাৰ শতবৰ্ষ সমাৰোহ কেন্দ্ৰত আয়োজিত মত বিনিময়ৰ এক বিশেষ অনুষ্ঠানতো ছাত্ৰ-ছাত্ৰী সকলে অংশগ্ৰহণ কৰে ৷ অনুষ্ঠানত পূৱ অসম বন্যপ্ৰাণী সংমণ্ডলৰ ডি এফ অ’ ৰমেশ কুমাৰ গগৈ, কাজিৰঙাৰ গৱেষণা বিষয়া ৰবীন্দ্ৰ শৰ্মাৰ লগতে ডাঃ নবীন পাণ্ডে আৰু সুমন্ত কুণ্ডু উপস্থিত থাকি ছাত্ৰ-ছাত্ৰীসকলৰ লগত মত বিনিময় কৰাৰ উপৰিও প্ৰাইমেট সম্পৰ্কত সচিত্ৰ উপস্থাপনেৰ বিস্তৃত আলোচনাও কৰে ৷
