পৰিৱৰ্তনৰ প্ৰতিশ্ৰুতিৰে জনতাৰ মন জয় কৰি শাসনৰ গাদী দখল কৰা বিজেপি চৰকাৰখনৰ প্ৰতিশ্ৰুতি যে অসাৰ সেইয়া প্ৰতিপন্ন কৰিছে লখিমপুৰ জিলাৰ অন্তৰ্গত বৃহত্তৰ লোহিত খাৱলোবাসী অঞ্চলৰ অনগ্ৰসৰতাই।
কাহানিও দুৰ্দশাৰ অন্ত নপৰা বৃহত্তৰ লোহিত খাৱলো পঞ্চায়তটোৰ এতিয়া যাতায়ত যোগাযোগৰ একমাত্ৰ সাৰথি হৈছে ৰচীৰে টনা হাত নাও।
দুখন তুলুঙা হাত নাও জোৰা দি তাৰ ওপৰত এখন বাহৰ চচালি পাৰি দি ৰচীত ধৰি পাৰ হয় নিতৌ শ-শ লোক। বিজ্ঞান-প্ৰযুক্তিবিদ্যাৰ যুগতো এইদৰে ৰচী টনা নাৱেৰে যাতায়াত কৰিব লগা হোৱা কাৰ্যক সকলোৱে এতিয়া একেমুখে ধিক্কাৰ দিছে।
মন কৰিবলগীয়া কথা যে বছৰ-বছৰ ধৰি এইদৰে যমৰ যন্ত্ৰনা ভোগ কৰি অহা অঞ্চলবাসীৰ বাবে এনেধৰণৰ যাতায়াত ব্যৱস্থা কিমান ভয়াবহ হ’ব পাৰে সেইয়া সকলোৰে জ্ঞাত।
উল্লেখযোগ্য যে লোহিত খাৱলুৰ ৩২খন গাঁৱৰ প্ৰায় ৩৬ হাজাৰ লোকে যাতায়াতৰ বাবে অধিক সময় নাঁৱৰ ওপৰতেই পাৰ কৰিব লগা হয়। এনেদৰেই এতিয়া ৰাজ্যখনৰ বিভিন্ন প্ৰান্তৰ জলন্ত সমস্যাই উদঙাইছে পৰিবৰ্তনকামী চৰকাৰখনৰ উন্নয়নৰ প্ৰকৃত ছবি।
