অসম ৰাজ্যিক চিৰিয়াখানাত বৰ্তমান কিমানখিনি জীৱ-জন্তু আছে, তাৰ সঠিক তথ্য বৰ্তমানলৈকে দিব নোৱৰা এক অভিযোগ উঠিছে। এই অভিযোগ আনিছে চিৰিয়াখানা সুৰক্ষা মঞ্চই।
এই সম্পৰ্কত আজি চিৰিয়াখানাৰ কাষতে থকা চিৰিয়াখানা সুৰক্ষা মঞ্চৰ কাৰ্য্যালয়ত এক সংবাদমেল সম্বোধন কৰি পুনৰবাৰ চিৰিয়াখানা কৰ্তৃপক্ষ আৰু বিজেপি চৰকাৰৰ বিৰুদ্ধে সৰৱ হৈ পৰে চিৰিয়াখানা সুৰক্ষা সমিতিৰ সাধাৰণ সম্পাদক ৰাজকুমাৰ বৈশ্য।
উক্ত সংবাদমেলত তেওঁ কয়, “আৰ টি আই তথ্য মতে ২০১৭ চনৰ ১ ছেপ্তেম্বৰলৈকে চিৰিয়াখানাৰ জীৱ-জন্তুৰ সংখ্যা আছিল ১২২৩টা। তাৰ বিপৰীতে ইণ্টাৰনেটত এই সংখ্যা ৮৯৫টা বুলি উল্লেখ আছে।”
আনহাতে, চিৰিয়াখানা কৰ্তৃপক্ষই দিয়ামতে বন মন্ত্ৰীয়ে বিধানসভাত দাখিল কৰা তথ্য অনুসৰি ২০১৭ চনৰ ১ ছেপ্তেম্বৰলৈকে ১১২৯টা আৰু ৩১আগষ্ট ২০১৮ত ১২০৪ টা জীৱ-জন্তু আছে। চিৰিয়াখানা সুৰক্ষা মঞ্চই এই কথা সংবাদমেলত জনায়।
ইয়াৰোপৰি, চিৰিয়াখানা কৰ্তৃপক্ষৰ ‘আৰ টি আই আৱেদনৰ উত্তৰত দিয়া তথ্য শুদ্ধ নে, ইণ্টাৰনেট অথবা বিধানসভাত দাখিল কৰা তথ্য সত্য?’ এইবুলি ৰাজকুমাৰ বৈশ্যই সংবাদমেলত প্ৰশ্ন কৰে।
উক্ত সংবাদমেলত ‘জাতি-মাটি-ভেটি’ৰ কথা কোৱা পৰিৱৰ্তনকামী চৰকাৰখন বহিৰাগত এটা লবীৰ দ্বাৰা পৰিচালিত হৈ আছে বুলি অভিযোগ কৰে বৈশ্যই।
তেওঁ লগতে কয়, “সঠিক তথ্য দিব নোৱাৰা উক্ত বহিৰাগত লবীয়ে ১৭৫ হেক্টৰ ভূমি বহিৰাগত এটা লবীৰ হাতত গতাব বিচাৰি আছে।”
আনহাতে, চলিত বৰ্ষৰ এপ্ৰিল মাহত অনুষ্ঠিত বিধান সভাৰ অধিৱেশনত চিৰিয়াখানাত সংঘটিত কেলেংকাৰিৰ তদন্তৰ দায়িত্ব অতিৰিক্ত মুখ্য সচিবক দিয়া হৈছিল বুলি দাবী কৰি বৈশ্যই লগতে প্ৰশ্ন কৰে, “তাৰ পৰিৱৰ্তে পুনৰ বন সংৰক্ষক এগৰাকীক অৰ্পণ কৰাৰ ৰহস্য কি?”
ইয়াৰোপৰি চলিত বিধান সভাৰ শীতকালীন অধিবেশনত পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতাক বাদ কৰি অন্য ১২৫গৰাকী বিধায়কে চিৰিয়াখানাৰ প্ৰসংগ উত্থাপন নকৰা কথাটো ৰহস্যজনক বুলি সন্দেহ প্ৰকাশ কৰি বৈশ্যই কয়, “বাকী বিধায়কসকলে চিৰিয়াখানাখনক জাতীয় সম্পদ বুলি নাভাবে। হয়তো তেওঁলোকে ১৭৫ হেক্টৰ মাটিৰ ভাগ আশা কৰি আছে।”
