হাছিলা বিলত হোৱা উচ্ছেদৰ পিছত উচ্ছেদিত ৰাইজক সাহায্য দিবলৈ গৈ আক্ৰমণৰ বলি হ’ল সাংসদ ৰকিবুল হুছেইন। সাহায্য দিবলৈ যোৱাৰ সময়তে ৰকিবুল হুছেইনৰ কনভয়লৈ বোকা, বটল আদি নিক্ষেপ কৰে আক্ৰমণকাৰীয়ে।
ইয়াৰ পিছতে কংগ্ৰেছৰ সাংসদ ৰকিবুল হুছেইনে শাসকীয় বিজেপিক তীব্ৰ সমালোচনা কৰি উচ্ছেদিত পৰিয়ালক সাহায্য প্ৰদানত বাধাৰ সৃষ্টি কৰাৰ অভিযোগ উত্থাপন কৰে।
সংবাদমেল সম্বোধন কৰি হুছেইনে কয়, “হাছিলা বিলত আমাৰ প্ৰৱেশক ইমানেই বাধা দিয়া হৈছিল যে উচ্ছেদিত পৰিয়ালক খাদ্য সাহায্য প্ৰদান কৰিবলৈও দিয়া হোৱা নাছিল।”
কংগ্ৰেছ নেতাগৰাকীয়ে বিজেপিক ভুল তথ্য প্ৰচাৰ কৰাৰ প্ৰত্যক্ষ অভিযোগ উত্থাপন কৰে। “মোক কোৱা হৈছে যে যদি আমি কংগ্ৰেছে উচ্ছেদ কৰা লোকসকলক সহায় কৰোঁ, তেন্তে ‘তেওঁলোকে’—মানে বিজেপিয়ে—সমৰ্থন প্ৰত্যাহাৰ কৰিব। এই কথা কোনে বিয়পাইছে? আৰু এই কথা স্থানীয় লোকে উপলব্ধি কৰিব লাগিব।”
ক্ষতিগ্ৰস্ত পৰিয়ালসমূহৰ প্ৰতি উদ্বেগ প্ৰকাশ কৰি হুছেইনে আবেদন জনায়, “মই উচ্ছেদ কৰা পৰিয়ালসমূহক আহ্বান জনাইছো—অহা ছমাহলৈকে আপোনালোকৰ ঘৰ-বাৰী সুৰক্ষিত কৰিবলৈ চেষ্টা কৰক। আগন্তুক উচ্ছেদৰ আৰ্হি আমি ইতিমধ্যে জানো।”
সংবাদমেলত হুছেইনে অসমৰ মুখ্যমন্ত্ৰী হিমন্ত বিশ্ব শৰ্মাৰ কথা পৰোক্ষভাৱে উল্লেখ কৰি কয়, “আপুনি সাপক বিশ্বাস কৰিব পাৰে, কিন্তু তেওঁক নহয়। এই সকলোবোৰৰ আঁৰত কোনো ‘তৃতীয় ব্যক্তি’ নাই—এজন মানুহহে আছে। মই এই কথা ৰেকৰ্ডত কৈছো।”হুছেইনে সামৰণিত নিজৰ বক্তব্যৰ সম্ভাৱ্য বিকৃতিৰ বিষয়ে সংবাদ মাধ্যমক সকীয়াই দি দাবী কৰে যে, “মই জানো যে তেওঁৰ এজেণ্ডাৰ লগত খাপ খুৱাই বাতৰিবোৰৰ লগত হেতালি খেলা হ’ব।”
