জাৰ্মানীত সোণ আৰু ব্ৰঞ্জৰ পদক দখলেৰে অসমৰ প্ৰতিভাৱান শ্বুটাৰ হৃদয় হাজৰিকাৰ দপদপনি
অসমৰ উদীয়মান শ্বুটাৰ হৃদয় হাজৰিকাই নিজৰ সোণোৱালী শ্বুটিং কেৰিয়াৰত আন দুটি আন্তঃৰাষ্ট্ৰীয় পদকৰ সংযোজনেৰে দেশৰ লগতে অসমলৈ গৌৰৱ কঢ়িয়াই আনিছে।
জাৰ্মানীত চলি থকা আই এছ চি এইছ (ইণ্টাৰনেশ্যনেল শ্বুটিং কম্পিটিশ্যন অব হেন’ভাৰ) ত প্ৰতিভাৱান শ্বুটাৰ হৃদয়ে ব্যক্তিগত ১০ মিটাৰ এয়াৰ ৰাইফলৰ জুনিয়ৰ শাখাত ব্ৰঞ্জৰ পদক দখল কৰাৰ লগতে ১০ মিটাৰ এয়াৰ ৰাইফলৰ দলীয় শাখাতো সোণৰ পদক দখল কৰিবলৈ সক্ষম হয়।
ইয়াৰ পূৰ্বে, যুৱ শ্বুটাৰ গৰাকীয়ে দক্ষিণ কোৰিয়াত অনুষ্ঠিত হোৱা ৫২ সংখ্যক আই এছ এফ বিশ্ব শ্বুটিং চেম্পিয়নশ্বিপত জুনিয়ৰ শাখাৰ ব্যক্তিগত ১০ মিটাৰ এয়াৰ ৰাইফলত সোণৰ পদক অৰ্জন কৰিবলৈ সক্ষম হৈছিল।
তদুপৰি, হৃদয়ে ২০১৭ চনত জাপানত অনুষ্ঠিত দশম ‘এছিয়ান এয়াৰ গান চেম্পিয়নশ্বিপ’ ত সোণৰ পদক অৰ্জন কৰাৰ লগতে ২০১৮ চনত জাৰ্মানীৰ শ্বুলত অনুষ্ঠিত হোৱা আই এছ এছ এফ জুনিয়ৰ বিশ্বকাপ শ্বুটিঙত ১০ মিটাৰ এয়াৰ ৰাইফল ইভেণ্টত সোণৰ পদক আৰু চেক গণৰাজ্যৰ পিলজেনত অনুষ্ঠিত আন্তঃৰাষ্ট্ৰীয় শ্বুটিং প্ৰতিযোগিতাৰ জুনিয়ৰ দলীয় শাখাত ব্ৰঞ্জ পদক দখল কৰিবলৈ সক্ষম হৈছিল।
উল্লেখযোগ্য যে, নাৰায়ণপুৰৰ ঐতিহ্যমণ্ডিত মাধৱদেৱ মহাবিদ্যালয়ৰ অধ্যক্ষ ড০ শৰৎ হাজৰিকা আৰু ইভা শইকীয়া হাজৰিকাৰ একমাত্ৰ সন্তান হৃদয়ৰ সফলতাত গৌৰৱান্বিত হৈ পৰিছে সমগ্ৰ অসমবাসী।