আৰক্ষী বিষয়াৰ পত্নীক ব্লেক মেইলিং কৰি গ্ৰেপ্তাৰ হ’ল নিজকে সাংবাদিক বুলি পৰিচয় দিয়া আজাদ জাকাৰিয়া নামৰ এজন যুৱক। নুনমাটি আৰক্ষীয়ে যোৱা শুকুৰবাৰে গ্ৰেপ্তাৰ কৰে যুৱকজনক।
শুকুৰবাৰে নুনমাটিৰ ছেক্টৰ-২ৰ পৰা তথাকথিত সাংবাদিকগৰাকীক গ্ৰেপ্তাৰ কৰা হৈছিল যদিও আজিহে সমগ্ৰ ঘটনাটো পোহৰলৈ আহিছে। আনহাতে, যুৱকজনে পূৰ্বতে গুৱাহাটীৰ পৰা প্ৰকাশিত এখন কম প্ৰচলিত দৈনিক বাতৰিকাকতত কৰ্মৰত আছিল বুলি আৰক্ষীৰ আগত স্বীকাৰ কৰিছে। লগতে তেওঁ নিজৰ ফেইচবুক প্ৰফাইলতো জাৰ্নেলিষ্ট বুলি চিনাকি দিছে। অৱশ্যে বৰ্তমান তেওঁ ক’ত কৰ্মৰত সেয়া সঠিকভাৱে জানিব পৰা হোৱা নাই।
আৰক্ষীয়ে নৰ্থ-ইষ্ট নাওক দিয়া তথ্যমতে, নুনমাটি ছেক্টৰ-২ত বাস কৰা এগৰাকী আৰক্ষী বিষয়াৰ পত্নীয়ে উক্ত তথাকথিত সাংবাদিকগৰাকীৰ বিৰুদ্ধে মহিলাগৰাকীক ব্লেক মেইলিং কৰা বুলি এক গোচৰ ৰুজু কৰিছিল।
ঘটনাৰ বিষয়ে বিৱৰণ দি নুনমাটি আৰক্ষীয়ে কয় যে প্ৰায় ২ বছৰৰ আগতে মহিলাগৰাকী মৰিগাঁৱলৈ গৈ থকা অৱস্থাতে তেওঁৰ সৈতে আজাদ জাকাৰিয়া নামৰ যুৱকজনৰ চিনাকি হৈছিল।
আনহাতে, সাংবাদিক বুলি পৰিচয় দিয়া যুৱকজন মহিলাগৰাকীৰ ঘৰলৈ সঘনে গৈ গৈ তেওঁৰ মতলব বেয়া হৈ অহা বুলিও আৰক্ষী বিষয়াগৰাকীয়ে আমাক জানিবলৈ দিয়ে।
তাৎপৰ্য্যপূৰ্ণভাৱে মহিলাগৰাকীৰ সৈতে উক্ত যুৱকজনে যৌন সম্পৰ্ক স্থাপন কৰিবলৈ বিচৰাত মহিলাগৰাকী মান্তি হৈছিল বুলি আৰক্ষী সূত্ৰটোৱে কয়।
ইয়াৰোপৰি নুনমাটিৰ আৰক্ষী বিষয়াগৰাকীয়ে আমাক জনায় যে উক্ত যুৱকজনে ‘মহিলাগৰাকীৰ অশ্লীল ফটো ছ’চিয়েল মিডিয়াত আপল’ড কৰিম’, ‘সাংবাদিক হয়, যি-টি কৰিব পাৰো’ বুলিও দীৰ্ঘদিন ধৰি ভীতি প্ৰদৰ্শন কৰি আহিছিল লগতে বৃহৎ পৰিমাণৰ ধন দাবী কৰিছিল।
উল্লেখ্য যে, মৰিগাৱঁৰ ভুৰাগাৱঁত আৰক্ষী বিষয়া হিচাপে কৰ্মৰত মহিলাগৰাকীৰ স্বামী ঘৰত নথকাৰ সুযোগ লৈ যুৱকজনে মহিলাগৰাকীক শাৰীৰিকভাৱে অপদস্থ কৰিব বিচাৰিছিল যদিও মহিলাগৰাকীয়ে চিঞৰ-বাখৰ কৰাত ওচৰৰ মানুহে তেওঁক ধৰি নুনমাটি আৰক্ষীক খবৰ দিয়ে।
মহিলাগৰাকীয়ে কৰা অভিযোগৰ ভিত্তিত নুনমাটি আৰক্ষীয়ে ৪৭৩/১৮ আৰু ভাৰতীয় দণ্ডবিধিৰ ৩৫৪/৩৮৪/৩৮৭/৫০৬ ধাৰাত এক গোচৰ ৰুজু কৰি যোৱা ১০ আগষ্টত তেওঁক গ্ৰেপ্তাৰ কৰে। ইতিমধ্যে নুনমাটি আৰক্ষীয়ে সাংবাদিকজনক ন্যায়িক জিম্মালৈ প্ৰেৰণ কৰিছে।
