এটা সাধাৰণ মোবাইল ফোনৰ বাবেই নাতিয়েকে হত্যা কৰিলে আইতাকক।
ঘটনাটো মায়ানগৰী মুম্বাইৰ। মুম্বাইৰ মাউম্ট মেৰী গীৰ্জা ঘৰৰ সমীপতে থকা কছম’ কলনীৰ বাসিন্দা ৮০ বছৰীয়া ৰ’জি গণেশ ৰাওক তেওঁৰ ২৪ বছৰীয়া নাতিয়েকে এটা দামী মোবাইল ফোন কিনি দিবলৈ জোৰ দি আহিছিল।
নাতিয়েক খ্ৰীষ্ট’ফাৰ পেৰেইৰা এজন নিচাসক্ত যুৱক। নিচাৰ পৰা মুক্ত কৰাৰ বাবে পৰিয়ালে তেওঁক নিচা মুক্তি কেন্দ্ৰতো ৰাখিছিল যদিও ইয়াৰ বাবে যথেষ্ট খৰচ হোৱাত পৰিয়ালে খ্ৰীষ্ট’ফাৰক পুনৰ ঘৰলৈ লৈ আহিছিল।
ঘৰলৈ অহাৰ পিছতে যুৱক জনে তেওঁৰ আইতাকক মোবাইল ফোন এটা কিনি দিয়াৰ বাবে খাটনি ধৰে। কিন্তু আইতাকে নাতিয়েকৰ দাবী কোনো পধ্যে মানি ল’বলৈ সন্মত নহ’ল।
সেয়ে নিশাৰ ভাগত নাতিয়েক খ্ৰীষ্ট’ফাৰে চোকা অস্ত্ৰৰে আইতাকৰ ডিঙিত আঘাত কৰে। ফলত আইতাক ৰ’জিৰ দেহৰ পৰা মূৰটো বিচ্ছিন্ন হৈ পৰে।
ইয়াৰ পিছতে নাতিয়েকে আইতাকৰ কটা মূৰটো খোৱা মেজত সজাই ৰাখে।
পুৱা খ্ৰীষ্ট’ফাৰৰ ভাতৃয়ে প্ৰথমে এই ভয়াৱহ দৃশ্য প্ৰত্যক্ষ কৰি চিঞৰ-বাখৰ লগায়। লগে লগে আৰক্ষীক খবৰ দিয়া হয় আৰু আৰক্ষীয়ে ঘটনাস্থলীত উপস্থিত হৈ হত্যাকাৰী খ্ৰীষ্ট’ফাৰক গ্ৰেপ্তাৰ কৰে।
নাতিয়েকে এনেদৰে আইতাকক হত্যা কৰি কটা মূৰ খোৱা মেজত সজাই ৰখাৰ ঘটনাই মুম্বাইৰ লগতে সমগ্ৰ দেশতে চাঞ্চল্যৰ সৃষ্টি কৰিছে।
